Korrýpsıaǵa qarsy is-qımyl ulttyq búrosy BTA Banktan jymqyrylǵan qarjy isi týraly sotqa deıingi tergeýdi aıaqtaǵanyn málimdedi. Bul iste basty fıgýrant atalǵan banktiń burynǵy basshysy, opozısıalyq saıasatker Muhtar Áblázov. Ol ótken jyly jeltoqsan aıynda Eýropalyq odaq komıteti ony Reseıge ekstradısıalaýdan bas tartqan soń, fransýz túrmesinen bostandyqqa shyqqan. Bul týraly centralasian.org jazdy.
Korrýpsıaǵa qarsy qyzmettiń málimeti boıynsha, Áblázov BTA bankten qarjy jymqyrý úshin ózi basqaratyn qylmystyq top qurǵan, qyzmetin asyra paıdalanyp, aqshanyń izin jasyrǵan. Bul iske qatysty ózge fıgýranttardyń ishinde qańtar aıynda Túrkıadan Qazaqstanǵa ekstradısıalanǵan banktiń basqarma basshysynyń tóraǵa orynbasary bolǵan Jaqsylyq Járimbetov, banktiń basqarma basshysy bolǵan Sádýaqas Mamesh pen banktiń nesıe berý boıynsha dırektory bolǵan Qaırat Sadyqovtyń aty-jónderi atalady.
«Keltirilgen zıannyń jalpy somasy 7,5 mıllıard AQSH dollarynan asady. Tergeý isinde urlanǵan qarjy halyqtyń zeınetaqy qoryna salǵan salymy, Qazaqstan azamattarynyń jeke jınaǵy jáne sheteldik qarjy ınstıtýttarynan alynǵan qaryzy bolatyn»,- delingen korrýpsıaǵa qarsy qyzmettiń habarlamasynda. Sonymen birge qylmystyq is 2224 tomnan turatyny aıtylady.
Ulttyq búro Áblázovty eki ret — 2 aqpanda jáne 14 aqpanda Astanaǵa tergeýge shaqyrǵan.
Shetelde turatyn Áblázov ózine qarsy qozǵalǵan qylmystyq isterdiń bárin teriske shyǵaryp, saıası astary bar dep birneshe ret málimdegen.
