Qazaq aıtysynyń 2000 jyldardaǵy áıgili tarlandary aıtysty saǵynyp qalǵan sekildi. Endi Feısbýk jelisinde aıtysýǵa kóshipti, dep habarlaıdy «Qamshy» portaly. Ulttyq qundalaqtarymyzdy qashan da nasıhattap júretin aıtysker aqyn Muhamedjan Tazabek óz paraqshasynda «Qazaqtyń at ábzelderi qadym zamannan qajettilik pen komforttyń quraly bolsa, búgin ol alys aýyl men jaqyn mýzeıden ǵana kórer etnografıalyq etúd (úzik) bolyp barady. Áıtpese, basqasy bylaı tursyn, shylbyrdyń ıisi-aq ata-babamyz attyń jalynda júrip álemniń teń jartysyna ámirin júrgizgen zamananyń aromaty ǵoı… Turmysymyz túbegeıli ózgerse de, ulttyq túp-tamyrymyz osylardan ekenin umytpaıyq», — dep jazǵan edi. Aıtyskerdiń bul jazbasyna daýylpaz aqyn Dáýletkereı Kápuly óleńmen bylaı dep pikir aıtty:
«Jonjaılaýda óskesin keship aıdyn,
Túıesi joq qazaqtyń kóshi — qaıǵym.
Araptyń dalasynan qaıtqan bolsań,
Muhajan, atqa minseń, osylaı min!»
Atalǵan shýmaqqa Muhamedjan Tazabekov te qarap qalmaı, óleńmen jaýap berip sońy aıtysqa ulasty da ketti:
«Joq mende Qazaqıadan ózge qundy oı,
Qanymnan, qaǵymnan da bezbedim ǵoı.
Syrtymnan Arabıanyń dalasyna
Aparyp, ákep júrgen ózderiń ǵoı…»
Dáýletkereı de jaýapsyz qalmady:
«Murtsyz saqal jelpildep tamam asta,
Arab bop áńgime aıtyp alaqashpa.
Astyńa mingeniń de «arabydan»,
At basyn qashan burdyń mama aǵashqa?!»
Muhamedjan:
«Mingenim «araby» emes, «japondyq at»,
Babańnyń sıpaty edi saqal tym-aq.
Joly túzý jan aıtsa jurt senbeıdi-aý,
Aýzy qısyq pende aıtsa, zakon biraq…», —
Dáýletkereı:
«Astyńnan aqsamasyn «japondyq at»,
Al, «murtsyz jaraspaıdy saqal biraq».
Araby bas bilmeıtin asaý qusap,
Basyńda ala qashtyń, sho tam, brat?!»
Muhamedjan:
«Ekeýmiz neǵylamyz endi alysyp,
Baýyr bop aıaqtaıyq, kel, qaýyshyp!
Ne minse de túspesin Qazaq attan,
Júreıik úzeńgini teń qaǵysyp!»
Dáýletkereı:
Muhajan, bola qaldyń qaı naǵashy?
Jigitsiń attan túspes aınalasy.
Qaýyshsaq qaýyshaıyq osymenen,
Men emes, «aýzy qısyq baı balasy»!- dep aıtysty aıaqtady. Jelidegi eki aqynnyń aıtysyna pikir bildirip baǵa berýshiler de boldy.
