30 naýryzda Muhtar Áýezov atyndaǵy teatrdyń «Syrlasý» zalynda jas aqyn Móldir Aıtbaıdyń «Syılyq» atty kitabynyń tusaýkeseri ótti. Kesh júrgizýshisi Baqyt Bedelhan, al kitaptyń tusaýyn kesken Iran-Ǵaıyp.

Sondaı-aq, ádebı keshke Muhtar Áýezov teatrynyń beligili akteri Bekjan Turys qatysty. Aqynǵa jyly lebizin bildirip, aq batasyn berdi.

Odan bólek, qalanyń jas aqyndary, ánshileri kelip, biri Móldir Aıtbaıdyń óleńderin oqyp tebirentse, endi biri óleńderine jazylǵan ánderin oryndap, halyqtyń kóńilin marqaıtty.

Jastardyń bul áreketine aqyn Baqyt Bedelhan  rıza boldy. 

«Aqyn, ánshi, kompozıtor, akter – tórteýi bir-birimen baılanysyp, bir týdyń astynda bolýy kerek.Osy tórt juldyz bir-birine qoldaý kórsetse, sol yntymaǵynyń arqasynda birtalaı jerge jetetin edi» dep aqylyn aıtty.

Kesh barysynda, aqyn óziniń jyrlaryn oqydy.

 «Óleń jazsam, óshirgenim otymdy,

 Únsiz qalsam, qorqyńdar...», deıdi aqyn bir óleńinde. Iá, bar aqynǵa tán qasıet – náziktik pen myqtylyq. Osy ekeýin ushtastyra bilgen aqyn ǵana kóptiń kóńilinen shyǵyp, úlkenniń batasyn almaq. Móldirdiń jyr-jınaqtarynan da osy qasıetterdi baıqaýǵa bolady.

Aıta keteıik, Móldir Aıtbaı Ábdýmanapqyzy 1991 jyly 26 qarashada Qyzylorda qalasynda dúnıege kelgen. Aqyndyq óner Móldirge anasynan daryǵan. Ár ana úshin baqyttyń, qýanyshtyń eń bıigi – balasynyń jetken jetistigi. Kitaptyń tusaýkeserine Móldirdiń anasy Qazyna apaı da qatysyp, qyzynyń qýanyshymen bólisti. Jyly lebizin arnap, qýanyshtan kózine jas aldy.

Anadan daryǵan aqyndyq ónerdiń bıigine talpynyp kele jatqan Móldir birneshe oblystyq, respýblıkalyq, halyqaralyq jyr músháıralary men aqyndar aıtysynyń júldegeri. Buǵan deıin «Móldir óleń» atty poezıa jınaǵy jaryq kórgen. Endi, mine «Syılyq» atty jınaǵynyń tusaýy kesildi.

Jas aqynǵa shabytyńyz taýsylmasyn, oqyrmandaryńyzdyń sany artsyn degen ystyq lebizmizdi bildiremiz.

Qamshyger: Gúlim JAQAN