10 mamyrda Óskemen qalasynda qasıetti Ramazan aıynyń qarsańynda Qazaqstan musylmandary dinı basqarmasynyń Tóralqa Májilisi ótti, dep habarlaıdy Qamshy aqparattyq agenttigi.

Alqaly jıynǵa Bas múftı Erjan qajy Malǵajyuly, naıb múftıler – Serikbaı qajy Oraz, Naýryzbaı qajy Taǵanuly, QMDB Apparat jetekshisi Ǵylymbek Májıev, QMDB bólim meńgerýshileri, QMDB-nyń oblystardaǵy ókil ımamdary qatysty.

QMDB baspasóz qyzmetiniń málimetinshe, basqosýda Ramazan aıynda qaıyrymdylyq aksıalaryn kóbirek uıymdastyrý, medreselerge shákirt jiberý, «Zeket» qorynyń jumysyn jandandyrý, pitir sadaqanyń ólshemin bekitý, jańa meshitterge at qoıý, meshit aýlasyn kórkeıtý, respýblıkalyq aqparattyq-nasıhattyq toptyń jumysyn pysyqtaý, t.b. máseleler talqylandy.

Sondaı-aq, bıylǵy Ramazan aıynda beriletin pitir sadaqa mólsheri anyqtaldy.

Ár oblystaǵy bıdaıdyń baǵasy eskerilip, ortaq mólshermen bekitildi. Tóralqa Májilisi músheleriniń biraýyzdy sheshimimen bıylǵy pitir sadaqa mólsheri – 300 teńge bolyp bekitildi.

Aıta keteıik, pitir sadaqany qurmanyń, meıizdiń, arpanyń, bıdaıdyń qunymen de berýge bolady.

Eger pitir sadaqany bıdaımen bereten bolsańyz, ár adam úshin jarty saǵ. Al jarty saǵ 1 keli 625 gramǵa teń. Aqshamen eseptegende (ár aımaqtyń bıdaı baǵasyna qaraı) 1 keli 625 gramnyń qunyn berý kerek. Qurma, meıiz, arpadan da bir saǵtyń (3,25 kg) qunyn berý qajet.  

Eske sala keteıik, pitir sadaqany Ramazan aıynyń birinshi kúninen oraza aıt namazyna deıin berýge bolady.

Sholýshy: Gúlim Jaqan