OQO turǵyny Baǵlan Temirbekov tórt balasyn jalǵyz baǵyp otyr. Qazir múgedek ulymen birge oblystyq balalar aýrýhanasynda jatyr. Negizi Baǵlannyń aýrýhanada emdelip jatqan uly deni saý bolyp týǵan, dep habarlaıdy Qamshy aqparattyq agenttigi Stan.kz saıtyna silteme jasap.
Jubaıy Zarınamen ajyrasqan soń , balalary anasynyń qaraýyna berilgen. Keıin bez búırek ana ulyna qaramaı, uryp –soǵyp, óz qolymen múgedek qylypty. Bul jóninde tórt balanyń ákesi óz suhbatynda aıtyp berdi.
Baǵlan qazir bir aıdan asa ýaqyt aýrýhanada múgedek ulymen jatyp, ólmestiń kúnin keshýde. Óıtkeni dárigerler balanyń mıynda isik paıda bolǵanyn aıtyp. Astana qalasynda kúrdeli ota jasaýǵa qujattaryn rásimdep jatyr.
Ári naýqas balanyń jaǵdaıy aýyr bolǵandyqtan, dárigerlerdiń kúndelikti baqylaýyna alynǵan.Perzentiniń múgedek bolýyn Baǵlan jary Zarınanyń qategizdiginen kórip otyr. Olaı deıtinimiz olar ajyrasqan soń, balalar anasynyń qamqorlyǵyna berilgen. Sol kezde olardy týǵan anasy qatygezdikpen aıaýsyz soqqynyń astyna alypty. Sonyń saldarynan uly Ábdirahman múgedektikke ushyrapty.
“Qyzym bir áńgimesinde anasynyń iship kelip, olarǵa qol jumsaǵanyn aıtqan bolatyn. Alaıda osy áńgimesine mán bermeppin. “Týǵan anasy ǵoı, balalaryn múgedek eterdeı ura qoımas” dep oıladym. Kúnderdiń kúninde iship kelgen anasy Ábdirahman esimdi balamnyń jelkesinen qatty uryp jibergen. Osy kezde ulymnyń murny ústelge tıip, qan josa bolǵan.
Keıin ulym qatty soqqydan jylaǵan soń, qaıyn atam ony túnniń jarymynda qoı qoraǵa qamap qoıǵan. Osy jaǵdaıdan soń, ulym psıhologıalyq soqqy alyp, basynyń aýrýy jıileı tústi. Keıin úıge ulymdy ákep júrgende ol maǵan “Papa basym aýyrady, qusqym keledi ” dep shaǵymdanýdy bastap, onysymen qoımaı qoryldaýy da jıileı tústi.
Keıin balamdy dárigerlerge kórsetken edim, tumaý bolyp qalǵan dep dári jazyp berdi. Túrli ýkol da saldy. Aýrýhanaǵa jiberedi, túrli em qabyldatty. Biraq, aýrýdyń naqty sebebin tappaǵan soń, emniń esh nátıjesi bolmady.
Keıin oblystyq balalar aýrýhasyndaǵy dárigerlerge kórsetken edim, MRT ǵa túsirýge keńes berdi. Bul tekserýden keıin ulymnyń mıyna sý jınalyp, isik paıda bolǵany anyqtaldy.Iaǵnı, anasy urǵannan soń, balamnyń basynda isik paıda bolypty.” ,- deıdi tórt balanyń ákesi Baǵlan Temirbekov.
Baǵlannyń áıelimen ajyrasqanyna bes jyldan asqan. Olarda ortaq bes bala bar. Qazir olardyń tórteýi ákelerimen turady. Balalary anasynyń qasyna barmaımyn dep jylaıdy eken. Sondyqtan, áke tórt perzentin baýyryna basyp, ózi qaraýyna týra kelgen.
Oǵan qosa, balalarynyń anasy perzenterin únemi bir bólmege qamap, ózi aptalap joǵalyp ketedi eken. Muny esi kirip qalǵan qyzdary da aıtyp otyr. Biraq, zań jaǵynan alyp qaraǵanda, balar Zarınanyń qaraýynda bolýy tıis.
Óıtkeni, sot sheshimi boıynsha balalar anasynyń qamqorlyǵyna berilsin degen úkim shyǵarylǵan. Ákeleri aýrýhanada jatqan kezde, úsh bala óz ata-ájesiniń qaraýynda.
” Balalarymnyń anasyna qatygezdigi úshin ashýlymyn. Únemi osy. Bala shaǵasyn tastap ketip, ózi jaıbaraqat qańǵyryp júre beredi. Aýdandaǵy sot ókilderi men ýchaskelik polıseılerde onyń bul áreketin jaqsy biledi. Biraq, zań jaǵynan sheshim qabyldaǵanda, Zarınanyń paıdasyna sheshedi. Barlyǵy bir aýyzdan kelisip alǵandaı.
Men balalardy zańdy túrde ózimniń qaraýyma alǵym keledi. Bul úshin talaı esikti tozdyrdym. Degenmen, eshqandaı nátıje joq. Jáne de týǵan ulyn uryp soǵyp, múgedek qylǵan ananyń jaýapqa tartylýyn suraımyn.” ,-deıdi tórt balanyń ákesi.
Jalǵyz basty áke men naýqas balanyń aýrýhanadaǵy álegi áli jyldarǵa sozylatyn sıaqty. Óıtkeni múgedek balany áli alda kúrdeli ota kútip tur. Otadan keıin balaǵa kútim men ońaltý emderi qajet.
Biraq, dárigerler múgedek balanyń tolyq saýyǵyp ketýine eshqandaı kepildik bermeı otyr. Qazir naýqas bala ózdiginen tynys ala almaıdy, apparattqa tańylǵan. Oǵan qosa sóıleýden qalyp, júre de almaıdy.Sondyqtan, dármensiz áke kúndiz túni ulynyń qasynan shyqpaı, qamqorlyq kórsetýde. Al balalardyń anasy bólek turyp jatyr.
