Qazaqstandyq ánshi Dımash Qudaıbergen Qytaıdyń Hýnan provınsıasynda bolǵan sý tasqyny apatynan zardap shekkenderge aqshalaı kómek kórsetti,-dep habarlaıdy Qamshy aqparattyq agenttigi QazAqparatqa silteme jasaı otyryp.

Hunan telearnasynyń weibo áleýmettik paraqshasynda jarıalanǵan aqparatqa qaraǵanda, Dımash Mango V qory arqyly Hýnan provınsıasyndaǵy sý tasqynynan keıin qaıta qalpyna keltirý jumystary úshin kómek retinde 300 myń ıýán (14 mıllıon teńge) qarajat aýdarǵan. Qazaqstandyq ánshi Hýnan provınsıasynda ótken «Singer» án baıqaýy arqyly álemge tanylǵandyǵyn aıta kelip, bul kómekti óziniń azamattyq boryshy dep esepteıtindigin jetkizgen.

Aıta keteıik, maýsym aıynyń sońynan bastap jaýǵan tolassyz jaýyn saldarynan Qytaıdyń Hýnan provınsıasynda alapat sý tasqyny bolyp, kóptegen adamdar úı-kúısiz qalǵan edi. Apattyń saldaryn joıýǵa Qytaı úkimeti men eldiń tanymal adamdary qol ushyn berýde. Eske salsaq, Dımash bıylǵy jyldyń basynda Hýnan provınsıasynyń ortalyq qalasy Chansha qalasynda «Singer 2017» án baıqaýyna qatysyp ekinshi oryndy jeńip aldy. Qazaqstandyq ánshi Qytaıǵa jáne álemniń kóptegen elderine tanymal boldy.

Sholýshy: Ásel Bolatqyzy