«Baıanaýyl» tabıǵı ulttyq parkiniń qyzmetkeri Jasybaı kóline demalýǵa keletin týrıserdiń kóbi tazalyqqa selqos qaraıtynyn aıtty, dep habarlaıdy pavlodarnews.kz tilshisi. «Baıanaýyl» tabıǵı ulttyq parki «Jasybaı» ormanshylyǵynyń orman sheberi Juldyz  Tuıaqbaevtyń sózinshe, Jasybaı kóli men ormanyn kúzetýge ıaǵnı, órttiń aldyn alyp, kól jaǵalaýynyń tazalyǵyn saqtaý úshin alty adam ǵana jumyldyrylǵan.

- Tańnan qara keshke deıin úı betin kórmeımiz. Óıtkeni, alty adam Jasybaıdyń búkil ormany men kólin qadaǵalaýǵa úlgermeı qalady. Alty adamǵa bir ǵana «Nıva» avtokóligi berilgen. Demalýshylardyń arasynda nebir sóz uqpaıtyn adamdar bolady. Tazalyq saqtańdar desek ózimizge qarsy shyǵyp, ózderiniń bilgenin istegisi keledi.

Katamaranmen kólde júzip júrip, ishken sýsyndarynyń ydystaryn laqtyryp ketedi. Kún jyly kezde olar túnde taýǵa shyǵyp ketedi de ot jaǵady. Endi ony óshirmeı ketetin bolsa búkil orman órtke oranýy ábden múmkin. Sondyqtan, olardyń árbiriniń artynan erip júrip, túngi saǵat 12-de ottaryn sóndirip, qonaqúıge qaıtaramyz. Eger, qandaı bir tótenshe jaǵdaı oryn alsa, barlyǵyna biz jaýap beremiz.

Biraq, sony jurt túsine bermeıdi, - deıdi Juldyz Tuıaqbaev. «Baıanaýyl» tabıǵy ulttyq parkiniń týrızm jónindegi ınjeneri Sultan Ardabaıdyń sózinshe, Jasybaı kóliniń jaǵasynda bir aıda 20 myńnan astam adam demalady. Bıylǵy jylǵy demalys maýsymy ashylǵan kúnnen bastap, 40 myńnan astam saıahatshy kelgen. Ulttyq parkke qarasty «Baıanaýyl, «Jasybaı» jáne «Dalba» ormanshylyǵynyń qyzmetkerleri ár aptanyń juma jáne senbi kúnderi tazalyq júrgizip turady.

Sholýshy: Ásel Bolatqyzy