Astana qalasynyń EKSPO Kongres ortalyǵynda «World Robot Olympiad» degen ataýmen robototehnıkadan respýblıkalyq jarys bastaldy dep habarlaıdy Qamshy aqparattyq agenttigi QR Bilim jáne ǵylym mınıstrliginiń Baspasóz qyzmetine silteme jasap.
Respýblıkalyq saıysqa elimizdiń túkpir-túkpirinen úsh júzden astam mektep oqýshylary qatysyp jatyr. Jarys «Negizgi», «Shyǵarmashylyq» jáne «Robot fýtboly» kategorıalar boıynsha ótkiziledi.
Robototehnıka boıynsha ulttyq chempıonattyń ashylýynda jas daryndardy Bilim jáne ǵylym mınıstri Erlan Saǵadıev, «Nazarbaev Zıatkerlik mektepteri» DBBU basqarmasynyń tóraıymy Kúlásh Shámshıdınova jáne «LEGO Education» kompanıasynyń TMD boıynsha ókili Iýrıı Vırıch quttyqtady.
300 qatysýshynyń 200 astam delegattary Zıatkerlik mektepterde oqıdy. Ońtústik astanamyzdan 30 oqýshy qatysýda, ıaǵnı eń kóp delegasıany Almaty qalasy qurap otyr.
Baıqaýdyń eń jas qatysýshysy – Pavlodardan kelgen 8 jasar Jasmın Eshanova. Ol baıqaýdyń «Negizgi» sanatynda óner kórsetedi. Jasmın mınıstrdiń qolynan arnaıy syılyq – noýtbýk aldy. Onyń bapkeri – Nazym Arystanbekqyzy, 2015 jylǵy Pavlodar qalasy Nazarbaev Zıatkerlik mektebiniń túlegi, úsh top daıyndady.
– Biz barlyq mektepterde sıfrli tehnologıalarǵa degen qyzyǵýshylyqty oıatýdamyz, ulttyq chempıonattyń qatysýshylary búginniń ózinde sıfrli Qazaqstannyń negizin qalap úlgerdi, – dep atap ótti bilim jáne ǵylym mınıstri Erlan Saǵadıev is-sharanyń ashylý saltanatynda.
Jarys jeńimpazdary arasynan 2017 jylǵy 10-12 qarashada Kosta-Rıkada ótetin WRO-2017 halyqaralyq olımpıadasyna barý úshin ulttyq top qalyptastyrylatyn bolady.
– Biz olımpıada qatysýshylaryn sátti keleshek kútip turǵanyna senemiz. Óıtkeni olar búginniń ózinde synı turǵydan oılanyp, sandyq tehnologıalarǵa úlken qyzyǵýshylyq tanytyp otyr. Bul naǵyz ǵalymdarǵa tán qasıet, – dep atap ótti «Nazarbaev Zıatkerlik mektepteri» DBBU-nyń basqarma tóraıymy Kúlásh Shámshıdınova.
Ulttyq chempıonat – WRO robototehnıka boıynsha halyqaralyq kezeńiniń irikteý bólimi. «Nazarbaev Zıatkerlik mektepteri» DBBU
2014 jyldan bastap «World Robot Olympiad-tyń» Qazaqstanda ulttyq úılestirýshisi bolyp tabylady jáne osy sharany Zıatkerlik mektepterde jyl saıyn ótkizip otyrady.
Sholýshy: Ásem Álmuhanbet
