Mundaı aqparatty Óńirlik komýnıkasıalar qyzmetinde ótken brıfıńte «QazAvtoJol» UK» AQ JOF dırektory Toqtarov Daýren Serjanuly, paıdalaný jáne qozǵalys qaýipsizdigi bóliminiń bastyǵy Tóltaev Daýren Almataıuly habarlady dep jazady Qamshy aqparattyq agenttigi QazAvtoJoldyń Baspasóz qyzmetine silteme jasap.
Daýren Serjanulynyń sózine súıensek, Jambyl oblysy boıynsha respýblıkalyq mańyzy bar avtomobıl joldarynyń jalpy uzyndyǵy 1237 shaqyrymdy quraıdy.
Búgingi tańda, quramyna 5 JPB (DEÝ) jáne 11 JPP (JPP) kiretin «Qazaqavtojol» RMK JOF-y tarapynan osy 1237 shaqyrym avtojolda kútip-ustaý jumystary júrgizilýde.
495 shaqyrymdy quraıtyn «Batys Eýropa-Batys Qytaı» halyqaralyq tranzıtti dáliziniń qaıta jańartý jumystary aıaqtaldy.
495 shaqyrym avtojoldyń 295 shaqyrymy İ-tehnıkalyq sanatty tórt jolaqty, 200 shaqyrymy İİ-tehnıkalyq sanatty eki jolaqty. Jalpy shaqyrymnyń 351 shaqyrymy sementbetondy, 144 shaqyrymy asfáltbetondy jamylǵy. Jol jamylǵysy 13 tn óstik salmaqqa jáne 20-25 jyl qyzmet kórsetý merzimine eseptelgen.
Jambyl oblysy boıynsha osy halyqaralyq tranzıtti dálizi negizinen qoldanystaǵy «Almaty-Tashkent-Termez» avtomobıl jolymen ótedi. Sonymen qatar Qordaı, Qúıik, Shaqpaq asýlaryn jáne Taraz qalasy, Qordaı, Qulan, Aısha-Bıbi, Baýyrjan Momyshuly, Shaqpaq ata eldi mekenderin jáne Qyrǵyzstan Respýblıkasy aýmaǵyn aınalyp ótedi.
2008 jyly Jambyl oblysyndaǵy «Batys Eýropa-Batys Qytaı» halyqaralyq tranzıtti dáliziniń jobalyq-izdenis jumystary bes jobalaýshy mekemelerdiń tarapynan júrgizildi (olar: «Kazdorproekt»; «KazNIıPI Dortrans»; «Astana Dorproekt»; «Qaraǵandy Kazdorproekt» jáne «Orta-Azıalyq Konsýltanttar Agenttigi»). Barlyq jobalar memlekettik saraptamadan ótip, qorytyndylary alynǵan.
Jambyl oblysyndaǵy osy qurylys jáne qaıta jańartý ýchaskeleri Azıalyq jáne Islamdyq damý bankteri tarapynan qarjylandyryldy.
Osy qurylys jáne qaıta jańartý ýchaskeleri bas merdiger mekemeler: «K-dorstroı»; «KSS»; «Djengız Inshaat» «KSS/Jambyljolqurylys»; «Kazahdorstroı»; «Kazahdorstroı/Húndaı» jáne «Aqmola qurylys materıaldary» kompanıalar tarapynan júrgizildi.
Sonymen qatar, osy qurylys jáne qaıta jańartý jumystarynyń barysy shet eldik kompanıalar «Dar Al Handaasa»; «SMEK»; «KOKS»; «Lavalın» jáne «Dohva» tarapynan qadaǵalandy.
Jalpy qurylys kezinde 22 kópir, 15 jol ótkelderi, 643 sý ótkizý qubyrlary, 11 kóliktik jol aıryǵy salyndy. Taraz qalasy, Otar, Qordaı, Merki, Aqyrtóbe jáne Baýyrjan Momyshuly aýyldarynda 3 «jol paıdalaný bólimsheleri» (DEÝ) men 3 «jol paıdalaný pýnkteri» (DEP) qurylys jáne qaıta jańartý jumystarynan ótti.
Qısyqsyzyqty brýstardyń jalpy uzyndyǵy 263 056 p.m quraıdy.
Qazirgi «Batys Eýropa-Batys Qytaı» avtojolyndaǵy kólik quraldarynyń qarqyndylyǵy táýligine – 7 500 kólikti quraıdy, onyń ishinde:
- jeńil avtokólikter men shaǵyn avtobýstar – 6 400-den joǵary (84 %)
- avtobýstar – 300-den joǵary (4,5%)
- júk tasıtyn kólikter – 800-den joǵary (10 %).
Búgingi tańda, osy avtojolda jol kólik oqıǵasy 2016-2017 jyldyń 5 aıdymen salystyrǵanda 30 %-ǵa kóbeıdi.
Jambyl oblysynda úlken jyldamdyqty avtojol qurylysy padalanýdaǵy magıstraldyń qýattylyǵy men kólik qatynasynyń sapasyn ǵana arttyryp qoımaı, sonymen qatar aımaqtyń ekonomıkalyq damýynyń da qýatty kózi bolyp qaldy. Atalǵan joldyń qurylysy barysynda jergilikti karerlerdiń tas-qum materıaldary, onyń ishinde jergilikti otandyq qurylys materıaldary óndirýshileri óndiretin ártúrli qumdy-untaqtalǵan tastardan turatyn qospalar, topyraq qorlary, temir–beton ónimderi, jol belgileri, sement, sol sıaqty jol qurylysyna qajetti taǵy da basqa materıaldar paıdalanyldy. Sýmen qamtamasyz etý sharalary jergilikti sý kózderinen alyndy. Sonymen qatar, óndiristik jumystarǵa 7 000-nan astam jergilikti eńbek resýrstary qamtyldy,- dep sózin túıindedi Daýren Serjanuly.
