2017 jyldyń 4 shildesinde № 2 avtoparkke tıesili memlekettik nómiri 142 AT 01. garajdyq V 001, № 50 avtobýsta jolaýshy men kondýktor jáne osy marshrýttyń júrgizýshisi arasynda janjal oryn alǵan.
Jolaýshylar kóligi basqarmasy, «Astana LRT» JSHS kóliktik baqylaý qyzmeti jáne №2 avtobýs parki atalǵan fakt boıynsha tekseris júrgizdi.
Avtobýsta ornatylǵan beınebaqylaýdyń kómegimen bul kıkiljińniń qalaı órbigenin anyqtady.
Saǵat 10.30 ýaqyt shamasynda Turan kóshesi boıyndaǵy «Ana men bala» aıaldamasynan №50 baǵyt boıynsha qatynaǵan avtobýs aıaldaý bóliginen asyp baryp toqtaıdy. Sebebi aıaldamanyń ortasynda № 51 avtobýs (garmoshka) turady da, júrgizýshige aıaldamanyń aldyna toqtaý múmkin bolmaıdy.
Bul faktige kóńili tolmaǵan jolaýshy atalǵan baǵyt júrgizýshisine bylapyt sóz aıta bastaıdy. Ony kondýktor sabyrǵa shaqyrǵanmen, ol telefonyndaǵy kamerany qosyp, avtobýsty júrgizip bara jatqan júrgizýshige barady. Jolaýshy daýys kóterip aıqaılap, avtobýstyń qaýipsiz júrýine kedergi keltiredi dep habarlaıdy Qamshy aqparattyq agenttigi Astana qalasy ákimdiginiń Baspasóz qyzmetine silteme jasap.
Avtomobıl kóligimen jolaýshylar men júkti tasymaldaý erejesine sáıkes avtokólik quraly qozǵalysyn basqarý kezinde júrgizýshiniń áńgimemen alańdaýyna tyıym salynady. Júrgizýshini alańdatý jol kólik oqıǵalaryna nemese odan da aýyr qaıǵyly oqıǵalarǵa ákep soǵýy múmkin. Saldarynan jolaýshylar zardap shegýi yqtımal.
Avtobýsta ornatylǵan beınebaqylaý kamerasynan alynǵan vıdeoda jolaýshynyń ózi júrgizýshimen janjal týdyrýǵa áreket etkeni kórinip tur. Al, kondýktor bolsa, jolaýshyǵa avtobýstyń ortasyna ótip, óz ornyna jaıǵasýdy shaqyryp, kıkiljińdi basýǵa tyrysqan.
Alaıda jolaýshy ary qaraı mobıldi telefonyna túsirýdi jalǵastyryp, osylaısha avtobýstyń qozǵalysyna kedergi keltirgen. Júrgizýshi birneshe ret telefondy alyp tastaýǵa tyrysqan. Tipti júrgizýshiniń qoly telefonǵa tıip ketip, ol aldyńǵy terezege qaraı qulaǵan. Bul faktige jolaýshy yzalanyp, júrgizýshini jaǵynan urǵan. Júrgizýshiniń sózinshe, ol baǵytty shatastyryp alyp, shuǵyl tejegishti basqan. Abyroı bolǵanda, jyldam toqtaǵannnan avtobýs salonynda eshkim zardap shekpegen, qulamaǵan.
Dene jaraqatyn salý jáne qoǵamdyq kóliktiń qozǵalysyna kedergi jasaý faktisi boıynsha №2 avtobýs parki aryz toltyrý ústinde, ol tıisti quqyq qorǵaý organdaryna jiberiledi.
Qol jumsaý áreketterinen keıin kondýktor óz-ózine ıe bola almaı, jolaýshyǵa daýys kótere bastaǵan.
Qandaı jaǵdaı bolmasyn, tártipti buzǵan buzaqyǵa kondýktordyń daýys kóterýge quqyǵy joq. Bul úshin kondýktor tártiptik jaýapkershilikke tartylady.
Oryn alǵan urys-keriske qoǵamdyq kóliktiń jolaýshylary aralasyp, er adamdy sabyrǵa shaqyrýǵa tyrysqan. Bul beınekameraǵa túsip qalǵan vıdeoda jazylǵan. Jolaýshy narazylyq týdyrǵan er adamdy sabyrǵa shaqyrýǵa tyrysqan, degenmen beınege túsirýin toqtatpaǵan.
Keleńsiz oqıǵa qoǵamdyq kóliktiń jolaýshylary men kondýktory, narazylyq týdyrǵan er adamnyń arasynda qarqyn alyp, daý-damaıǵa ulasqan. Jolaýshy dál osy sátti áleýmettik jelilerge salyp, beıneni taratyp jibergen.
Qyzmetkerlerdiń jumys sapasyn arttyrý maqsatynda Astanada kólik qyzmetkerleriniń kásibı sheberligin arttyrý ortalyǵy jumys isteıdi. Ol jerde qoǵamdyq kóliktiń qyzmetkerleri psıhologıalyq test, jol kólik qozǵalysynyń erejelerin bilý, tehnıkalyq tártiptiń kásibı negizi boıynsha oqylymdar sıaqty halyqaralyq standartqa negizdelgen oqýdan ótedi. Jolaýshylarǵa qatysty mádenıetti saqtaýǵa erekshe kóńil bólinedi.
Sholýshy: Ásem Álmuhanbet
