Búgin QR Tuńǵysh Prezıdenti – Elbasy Qory janyndaǵy Álemdik ekonomıka jáne saıasat ınstıtýtynda (ÁESI) álemniń úzdik 100 JOO tizimine kiretin Qytaıdyń aldyńǵy qatarly ǵylymı ortalyǵy – Fýdan ýnıversıtetiniń (QHR) ókilderimen kezdesý ótti dep habarlaıdy Qamshy aqparattyq agenttigi.
Qazaqstandyq jáne qytaılyq sarapshylar «Úlken Eýrazıadaǵy» geoekonomıka men geosaıasattyń jahandyq úrdisterin, «Bir beldeý – bir jol» jobasyn, sonymen qatar, birlesken zertteý jumystaryn júrgizý múmkindikterin talqylady.
Qytaı delegasıasynyń quramynda Fýdan ýnıversıteti vıse-prezıdentiniń orynbasary Chen Chjımın, Halyqaralyq qatynastar jáne memlekettik basqarý Mektebiniń, Reseı men Ortalyq Azıa ınstıtýtynyń, halyqaralyq zertteý ortalyqtarynyń ókilderi men Guancha.cn ınternet-portalynyń jýrnalıseri boldy.
- Biz qazaqstandyq jáne qytaılyq «aqyl-oı ortalyqtarynyń» birlesip jumys isteý máselelerin, Elbasy Nursultan Nazarbaevtyń jahandyq bastamalaryn talqylaýdyń nátıjeli alańy sanalatyn «Astana klýbynyń» 3-shi otyrysy aıasyndaǵy ózara yqpaldastyqty talqyladyq. Sondaı-aq, Qytaıdaǵy óz salasyndaǵy aldyńǵy qatarly think tank – Fýdan ýnıversıtetiniń Reseı jáne Orta Azıa ınstıtýtymen seriktestik týraly memorandýmǵa qol qoıyldy, - dedi kezdesý qorytyndysy boıynsha ÁESI dırektory Erjan Saltybaev.
Sholýshy: Ásem Álmuhanbet
