Jambolat Sársenov Dúnıejúzilik munaı keńesiniń marketıń jónindegi vıse-prezıdenti jáne Atqarýshy komıtetiniń múshesi bolyp saılandy, dep jazady Qamshy aqparat agenttigi. Bul týraly KAZENERGY qaýymdastyǵynyń baspasóz qyzmeti habarlady.
Atalmysh sheshim Ystambul qalasynda ótip jatqan 22-shi Dúnıejúzilik munaı kongresi aıasynda qabyldanǵan.
Jambolat Sársenov jańa qyzmetinde barlyq qatysýshylar arasyndaǵy qarym-qatynasty ońtaılandyrý, ulttyq jáne halyqaralyq munaı kompanıalaryn ári qaraı tıimdi damytý maqsatynda keńestiń oń bedelin kúsheıtý ári ilgeriletý sıaqty mańyzdy baǵyttar boıynsha Dúnıejúzilik munaı keńesine múshe elderdiń jumystaryn úılestiredi. Sonymen qatar ol Batys pen Shyǵys memleketterdiń, ásirese aǵylshyn tilinde sóılemeıtin elderdiń munaıǵa baılanysty múddeleri men tájirıbelerin biriktirýge qatysty máselelerge jetekshilik etedi. DMK aıasynda talantty mamandar men tájirıbeli kásipqoı mamandardyń daǵdylary men quzyretin biriktirý jáne úılestirý de Sársenovtyń basqarýynda bolmaq.
KAZENERGY qaýymdastyǵynyń baspasóz qyzmeti málim etkendeı, Qazaqstannyń energetıkalyq salasynyń aǵymdaǵy jáne perspektıvti damýynyń jaı-kúıi týraly keshendi túsinik qalyptastyrý maqsatynda Qaýymdastyq Ulttyq energetıkalyq baıandama ázirledi, onda Qazaqstan Respýblıkasynyń munaı-gaz jáne energetıka salasynyń birtutas júıe retinde turaqty damýyna KAZENERGY qaýymdastyǵynyń strategıalyq kózqarasy beınelengen. Qazaqstan DMK-ge Keńes sheńberindegi naryqtyń damýy jáne boljamdary týraly osyǵan uqsas esepter daıyndap berýge usynys jasaǵaly otyr.
Osylaısha Jambolat Sársenovtyń DMK-degi joǵary laýazymdy qyzmetke taǵaıyndalýy Qazaqstan atynan KAZENERGY qaýymdastyǵynyń dúnıejúzilik munaı naryǵynda oń bedeli men ustanymyn nyǵaıtýda jasalǵan kezekti bir qadamy bolyp tabylady jáne tájirıbe almasýǵa múmkindik beredi, sonymen qatar Keńes músheleriniń barlyq elderi arasyndaǵy yntymaqtastyqqa jańa serpin beredi.
Sholýshy: Gúlim Jaqan
