«Irak pen Levant lańkestik tobynyń» sodyrlaryna qarsy kúreste iri jetistikke qol jetti. Bul týraly Qamshy aqparattyq agenttigi sheteldik BAQ-qa silteme jasap habarlaıdy.
Irakta atyshýly uıymnyń beıresmı astanasy sanalatyn Mosýl tolyǵymen jaýdan tazartylyp, úkimet jasaǵynyń baqylaýyna ótti. Jergilikti halyqtyń qýanyshynda shek joq. Uzaq ýaqyt boıy úreıde ómir súrgen Mosýl jurty týǵan qalasynyń azat etilgenine sener-senbesin bilmeıdi. Eldegi ekinshi iri shahar 3 jyl boıy «Irak pen Levant lańkestik tobynyń» ýysynda bolǵan.
Onyń jaýdan arylǵany jaıly habardy tek Mosýl halqy ǵana emes, ózge de aýmaq turǵyndary zor qýanyshpen qabyldady.
Áskerılerdi jeńisimen quttyqtaý úshin qalaǵa Premer-mınıstrdiń ózi keldi. Negizi Mosýldy azat etý sharasy shamamen 9 aı boıy júrgizilgen. Oǵan úkimet jasaǵy men kúrd jaýyngerleri qatysqan. Sarbazdarǵa AQSH bastaǵan halyqaralyq koalısıa áýeden soqqy berip, qoldaý kórsetti. 9 aı ishinde 1300 ekstremıstiń kózi joıylǵan. Beıbit halyq arasynda da adam shyǵyny az emes. 4 myńnan astam turǵynnyń opat bolǵan. Al qaqtyǵys kezinde qaza tapqan jaýyngerlerdiń sany 30 myńǵa jýyqtaıdy.
Qazir jaýyngerler mınalardy zalalasyzdandyrýmen aınalysyp jatyr. Qaskóıler shahardan sytylyp shyqpas buryn olardy kóptep qoıyp tastaǵan. Negizi, 3 jyl boıy eldi mekendi ýysynda ustaǵan sodyrlar oıyna kelgenin istep baqty. Atys-shabystan jergilikti áýejaı, vokzal, ýnıversıtet, aýrýhana, mektepter men joldar búlindi. Jergilikti bılik munyń bárin qalpyna keltirý ońaıǵa soqpaıdy deıdi. Aldyn ala málimet boıynsha, bul jumystarǵa kemi 5 jyl jáne mıllıardtaǵan dollar ketýi múmkin.
Atyshýly uıymnyń Iraktaǵy bas tiregi azat etildi. Endi kórshi Sırıada osy toptyń beıresmı astanasy Rakka úshin shaıqas jalǵasyp jatyr. Sarapshylar onda da lańkesterdiń jeńiletinine kúmán keltirmeıdi. Alaıda sonyń ózinde de jaýdyń tize búgýi ekitalaı deıdi. Sodyrlaryń jartysy taýǵa qashyp, sonda jasyrynýy múmkin degen kúdik bar. Sondaı-aq jerdegi halıfatynan aıyrylǵan ekstremıster áleýmettik jeliler arqyly yqpal etýin kúsheıte me degen kúdik seıilmeı tur. Osy rette halyqaralyq qaýymdastyq ǵalamtordaǵy baqylaýdy kúsheıtýge shaqyryp otyr.
Sholýshy: Aıgerim Taýbaı
