Bul shara júktiliktiń erte kezeńinde áıelderdi ýaqytynda ári sapaly tekseristen ótkizý úshin engizilgen, dep habarlaıdy Qamshy aqparattyq agenttigi elorda ákimdiginiń medıa ortalyǵyna silteme jasaı otyryp.

- Sapaly ári ýaqytyly medısınalyq kómek kórsetý úshin bizde emhanalarda "jasyl dálizder" uıymdastyryldy.Júkti áıelder úshin arnaıy tirkeý bar.

Olar mindetti túrde akýsher-gınekolog dárigerge, terapevtke jáne ózge de mamandarǵa jiberiledi. Iaǵnı aýyryp júrgen basqa emdelýshilermen birge ortaq kezekte turmaıdy, - dep habarlady medıa ortalyq tilshisine elordalyq densaýlyq saqtaý basqarmasynyń bas shtattan tys akýsher-gınekology Halıda Sharıpova.

Onyń sózinshe, profılaktıkalyq tekseris júkti áıelderde ekstragenıtaldy patologıany der kezinde anyqtaýǵa múmkindik beredi.

- Áıelder saý balany dúnıege ákelý úshin, aıaǵy aýyr kezde keri áser bolmaý úshin ýaqytynda aýmaqtyq emhanalarǵa baryp turý kerek, aldyn ala daıyndyq júrgizý qajet. Ókinishke qaraı, dárigerge júkti bolǵan kezde ǵana keledi, - deıdi dáriger.

Qalalyq densaýlyq saqtaý basqarmasynyń málimetinshe, 2017 jyl basynan beri Astanada 6 myńnan astam bala dúnıege kelgen. Orta eseppen táýligine elordada búgingi ýaqytta jumys istep turǵan úsh perınataldi ortalyqta  60-65 bala ómirge keledi.

Salystyrar bolsaq, 2016 jyly Astanada 27 244 bala týylǵan. Bul 2015 jylmen salystyrǵanda 8%-ǵa artqan jáne rekordty kórsetkish. 

Sholýshy: Aqnur MUHTARHAN