Qazaqstanda aýyz sý tarıfi taǵy da ósýi kútilýde. Sarapshylar baǵanyń birden 32-40 paıyzǵa deıin qymbattaýy múmkin ekenin aıtyp otyr. Bul týraly "Qazaqstan Sý arnasy" qaýymdastyǵynyń ekonomıs-sarapshysy Mánshúk Sársenbekova "Kazpravda" basylymyna bergen suhbatynda málimdedi dep habarlaıdy Qamshy aqparattyq agenttigi sn.kz-ke silteme jasaı otyryp.

Onyń aıtýynsha, baǵanyń ósýi 2015 jyldyń sáýir aıynda bekitilgen tarıfter saıasatymen baılanysty eken.

"Tarıfter qurylymynda ınvestısıalyq salymdar paıda boldy, bul óz kezeginde qubyrlardy jańartýǵa, sýmen jabdyqtaý júıelerin jańǵyrtýǵa ınvestısıalar ákelýi tıis. Biraq bul tarıftik saıasatqa kóshý úshin sý arnalarynyń óz qarajattary jetpeıdi, sondyqtan baǵany ósirýge májbúr", - deıdi Sársenbekova.

Qazaqstannyń 8 qalasyndaǵy sý júıelerin qaıta jańartý jumystaryna ınvestısıa quıýdy birinshi bolyp Eýropanyń qaıta qurý jáne damý banki qoldaǵan.

"Kelesi jyly taǵy birneshe kelisimshartqa qol qoıylady dep kútilýde. Bul baǵytta qazir jumystar atqarylyp jatyr. Jalpy ınvestısıa kólemi 124 mlrd teńge. Eýropanyń qaıta qurý jáne damý banki 2015-2020 jyldar aralyǵynda 18,4 mlrd teńge ınvestısıa quıady", - deıdi Sársenbekova.

Sholýshy: Aqnur MUHTARHAN