Astanada Qorshaǵan ortany qorǵaý jáne klımat ózgerýi boıynsha EO-Ortalyq Azıa Jumys tobynyń kezdesýi ótti dep habarlaıdy Qamshy aqparattyq agenttigi. Bul jumys toby qorshaǵan ortany qorǵaý jáne sý resýrstary salasynda EO-Ortalyq Azıa yntymaqtastyq platformasy sheńberinde jumys isteıdi. Atalmysh platforma 2007 jyly qabyldanǵan Eýropalyq Odaqtyń Ortalyq Azıamen jańa áriptestik strategıasynyń bir elementi bolyp tabylady. Qatysýshylar qorshaǵan orta salasyndaǵy aımaqtyq yntymaqtastyqty nyǵaıtý, sý resýrstaryn basqarý, ınfraqurylym jáne klımattyń ózgerýi salasyndaǵy jobalardy halyqaralyq qarjylandyrý máselelerin, sonymen qatar, Ortalyq Azıa elderiniń áleýetin arttyrý/kadrlardy daıyndaýdaǵy basty qajettilikterin talqylady.
Otyrysqa Eýropalyq komısıa, EO múshe-elderiniń ókilderi, Qazaqstan, Qyrǵyzstan, Tájikstan, Túrikmenstan jáne Ózbekstan tıisti mınıstrlikteriniń ókilderi, halyqaralyq qarjy ınstıtýttary, Ortalyq Azıanyń aımaqtyq uıymdary, halyqaralyq uıymdar, sonymen qatar, ÚEU jáne azamattyq qoǵam ınstıtýttarynyń ókilderi qatysty.
«Búgingi kúni biz Jumys tobynyń bes otyrystaryn ótkizdik, onyń ishinde, Tashkentte, Mılanda jáne Brússelde. Tájirıbede qoldanysy jaǵynan Astanadaǵy osy 6-shy otyrys óte mańyzdy. Búgin biz ınfraqurylym jáne klımattyń ózgerýi salasyndaǵy jobalardy qarjylandyrý úshin halyqaralyq qorlarǵa qoljetkizýdiń basty máselelerin talqyladyq. Qorshaǵan orta jáne ınfraqurylym salasyndaǵy jobalardy qarjylandyrý, onyń ishinde ınvestısıalardy tartýǵa áser etetin aspektilerge qatysty saıasat máseleleri qarastyryldy. Osy maqsatpen EO qarjylandyratyn «WECOOP2»* jobasymen Ortalyq Azıadaǵy barlyq múddeli taraptar úshin ınvestorlar týraly Basshylyq ázirlenýde. Onda halyqaralyq qarjy ınstıtýttary qoldanatyn tártipter men irikteý krıterııleri boıynsha keńester usynylatyn bolady. Sonymen qatar, biz tabıǵatty qorǵaý qyzmetin basqarýdy jaqsartý jáne jobalar ázirleý maqsatynda Ortalyq Azıa elderi men aımaqtyq uıymdardyń áleýetin arttyrý qajettilikterin qanaǵattandyrý joldaryn qarastyryp jatyrmyz. Bolashaqta Ortalyq Azıa elderimen yntymaqtasý úshin basqa da ıdeıalardy damytýdamyz. Biz Ortalyq Azıa elderinen jobalardy daıyndaý, qarjylandyrý jáne memlekettik-jeke áriptestik boıynsha aımaqtyq jetik tájirıbe/konsýltasıalyq qyzmetter ortalyǵyn qurý týraly pikirlerin kútemiz», - dep Qazaqstandaǵy Eýropalyq Odaq ókildiginiń basshysy, Elshi Traıan Hrıstea kezdesý jóninde oıymen bólisti.
Ortalyq Azıa elderi sý jáne energetıkalyq resýrstary jaǵynan, sonymen qatar, tabıǵatty qorǵaý qyzmetin basqarý salasyndaǵy saıasattary jaǵynan ózara táýeldi. Ortalyq Azıa úshin eń kúrdeli máseleler sý resýrstarynyń sarqylýy, ósip kele jatqan sýǵa degen suranystan ýshyǵa túsetin sýdy paıdalanýdyń tómen tıimdiligi, ekojúıelerdiń nasharlaýy bolyp tabylady. Klımattyń ózgerýi, ındýstrıalandyrý, qalalardyń ósýi jáne ormansyzdaný aımaqtyń sý resýrstaryna qysymnyń burynǵydan artýyna yqpal etedi. Tabıǵat resýrstaryn uqypsyz basqarý jerlerdiń nasharlaýyna, topyraq erozıasyna jáne bıoalýantúrliliktiń joıylýyna ákeledi.
«WECOOP2» jobasy týraly
Aımaqtyq yntymaqtastyq jáne EO-Ortalyq Azıany qoldaýdyń ekinshi kezeńinde Eýropalyq odaq (EO) 2016 jyldyń tamyzynda qorshaǵan orta, klımat ózgerýi jáne sý resýrstary salasyndaǵy aımaqtyq yntymaqtastyq boıynsha jobany (WECOOP2) bastady. Ol Ortalyq Azıa áriptes-memleketteri arasyndaǵy dıalogty nyǵaıtýdy jáne turaqty damýdy jalǵastyrýǵa jáne olardyń EO-pen qorshaǵan orta jáne klımattyń ózgerýi máseleleri boıynsha yntymaqtasýyna járdemdesýge baǵyttalǵan. Jobanyń keńsesi Astanada, Qazaqstan, ornalasqan jáne ulttyq sarapshy-koordınatorlar áriptes-memleketterde bir-birimen kelisimdilikte jumys isteıdi. Jobany Eýropalyq Odaq qarjylandyrady, jáne «Stantec» quramyna kiretin «MWH» kompanıasy basqaratyn konsorsıým júzege asyrady. Konsorsıým áriptesteri bolyp Qorshaǵan ortany qorǵaý jónindegi Avstrıalyq agenttik jáne «AEO Kavkaz» Aımaqtyq ekologıalyq ortalyǵy bolyp tabylady.
