2018 jyly naýryzda Reseı Federasıasynyń bıliginde úlken ózgeris bolmaq. 11 naýryz kúni elde prezıdenttik saılaý ótedi. Saılaýǵa Pýtın túse me, joq pa, ol jaǵy ázirge belgisiz. Bir basshynyń ornyna ózgesi kelse, halyq arasynda alańdaýshylyq týyndaıtyny anyq. Jergilikti mk.ru portaly reseılik saıasatkerler arasynda Pýtınnen keıingi Reseıdi qalaı elestetýge bolatyny jaıynda saýalnama júrgizdi. Sarapshylardyń pikirin Qamshy.kz aqparat agenttigi oqyrman nazaryna usynady.
Andreı Nechaev, burynǵy ekonomıka mınıstri
«Kez kelgen adamnyń ornyn basýǵa bolady. Tek bári senarı boıynsha júzege asý kerek. Prezıdenttiń mırasqory bılik júıesin saqtap, dástúrli kúıde jalǵastyrsa, bári ózgerissiz kúıde qalyp, búgingi bılik júıesi uzaq jyldarǵa sozylatyn bolady.
Al eger Pýtınniń konservatıvtik kózqarastaryn qoldamaıtyn, ustanbaıtyn adam kelse, birinshi kezekte ekonomıkanyń damý baǵyty toqtap qalýy ábden múmkin. Eger ekonomıkany memlekettendirýdi jaqtaýshy, básekelestikti janshý prosesteri ornasa, onda memleket úlken toqyraýǵa ushyraıdy. Elimizde ekonomıkalyq sheshim qabyldaý júıesi joǵary ortalyqtandyrylǵan. Barlyq negizgi sheshimderdi prezıdenttiń ózi qabyldaıdy».
Dmıtrıı Gýdkov, táýelsiz saıasatker
«Pýtın búginde qartaıyp qalǵan. Birinshi kezekte moraldyq turǵydan sharshady. Jańa býyn – jańa tehnologıa. Al prezıdent eshqandaı jelige tirkelmegen, tipti smartfony da joq. Jańa býyn – bir-birimen úzdiksiz qarym-qatynasta bolý. Al prezıdent halyqpen baılanysý úshin jylyna bir ret qana tikeleı efırge shyǵady.
Jańa býyn – teńdiktiń ornaǵany, shekaranyń ashylǵany».
Anton Orlov, Zamanaýı saıası máseleler ınstıtýtynyń dırektorlar keńesiniń tóraǵasy
«Kelesi prezıdentti halyq mindetti túrde Pýtınmen muqıat salystyrady. Bul jaǵdaı memlekettiń bolashaq prezıdenti úshin aýyr psıhologıalyq júk bolmaq.
Al ol adam kim bolady degen suraqqa jaýap berý qıyn, degenmen memlekettiń odan talap etetin dúnıelerin tizip aıtýǵa bolady. Jańa basshynyń ulttyq múddeni qorǵaı otyryp, Batys elderimen kelisimge kele alatyn qabilettiligi bolýy shart. Eger memleket ol adamnan mundaı qasıetti baıqamasa, elde toqtatýy qıyn narazylyq daýy paıda bolady.
Búginde Reseıdiń jaǵdaıy múshkil, ekonomıkalyq daǵdarysty ótkerip jatyr. Al Pýtın – basty stabılızator. Bizdi eki jaǵdaı kútip tur: elde retsiz, berekesiz júıe ornaıdy, ne bolmasa múldem jańa ári joǵary deńgeıge oıysamyz. Batys elderi ekonomıkalyq saıasatta Reseıdi shektep qoıýy múmkin. Bul jaǵdaı eldiń toqyraýyna ákelip soǵady. Sol sebepti memlekettiń bolashaq basshysynyń ár qadamy Reseıdi ne óshiredi, ne ósiredi».
Valerıı Rashkın, Reseı komýnıstik partıasynyń Máskeý qalalyq komıtetiniń birinshi orynbasary
«Pýtınsiz álem de, Reseı de quldyramaıdy. Tipti ózgeris bolǵan jaǵdaıdyń ózinde, elge eshqandaı qaýip tónbeıdi. Pýtın qalyptastyrǵan bılik júıesi demokratıany degradasıaǵa ushyratty, bıliktegi adaldyq pen tutastyq tujyrymdary joıyldy, jemqorlyqpen kúrestik, sóıtip jeńildik. Kimniń qansha urlaǵany, ony kimniń urlaǵany mańyzdy emes. Ol adam qolǵa tússe de, jazalanbaıdy.
Alaıda el ıgiligi úshin istegen eńbekterin de aıtyp ótpeske bolmas. Qyrymnyń taǵdyry sheshýde, aýyr joldardy ótkerdi. Biz onyń baǵytyn sol jolǵa burǵanymyzben, sheshim qabyldaý úshin de erkektik minez kerek edi.
Pýtın ózindik bılik júıesin qalyptastyrǵan joq. Ol Elsın men Gaıdardyń jolyn jalǵastyryp keledi. Solardyń saıasatyn aına-qatesiz oryndap keldi. Al Pýtınnen keıin halyq tolqıdy ma? Meniń oıymsha, kelesi saılaýda naǵyz básekelester kúresi ornaıdy. Sebebi qoǵam Pýtınniń baǵyttarynan mezi boldy».
