Ońtústik Qazaqstan oblysynyń ákimdiginde óńir basshysy J.Túımebaevtyń tóraǵalyǵymen keńeıtilgen májilis ótti dep habarlaıdy Qamshy.kz  aqparat agenttigi OQO ákimdiginiń baspasóz qyzmetine silteme jasaı otyryp. Kún tártibinde 3 másele qaralyp, bıylǵy jylǵa qoıylǵan maqsat-mindetter sarapqa salyndy.

Oblysymyzdaǵy memlekettik qyzmet kórsetý sapasyn arttyrý boıynsha oblys ákimi apparaty basshysynyń orynbasary Gúlnur Asylbekova baıandama jasady. Onyń aıtýynsha, qazirgi tańda oblystyq jergilikti atqarýshy organdar tarapynan 194 qyzmet túri kórsetiledi. 2016 jyldyń qorytyndysy boıynsha halyqqa jalpy sany 20 181 504 memlekettik qyzmet kórsetilse, bıylǵy jyldyń 1 jarty jyldyǵynda bul kórsetkish 9 211 756-ǵa jetken. 

«Aǵymdaǵy jyldyń 6 aıynyń qorytyndysy boıynsha 1 509 070 qyzmet elektrondy túrde kórsetildi. Bul jalpy kórsetilgen qyzmetterdiń 16 paıyzyn quraıdy. Osy turǵyda 7,6 mln. qyzmetti elektrondy túrde nemese HQKO arqyly kórsetý múmkindigi bolǵanyn atap ótý qajet. Kórsetilgen qyzmetterdiń 80 paıyzy densaýlyq saqtaý salasyna tıesili», – deıdi Gúlnur Asylbekova.

Sońǵy 7 aıdyń qorytyndysy boıynsha HQKO arqyly 361 532 elektrondy qoltańba berilgen. Alaıda elektrondy qyzmetterdiń úlesi áli de tómen. Sebebi qyzmet usynýshy memlekettik organdar tarapynan elektrondy qyzmetterdi alý joldary turǵyndarǵa óz deńgeıinde nasıhattalmaı otyr.

Atalǵan máselelerdiń mán-jaıyna qanyqqan oblys ákimi qujattardyń merzimderin buzýǵa jol bergizgen aýdan, qala ákimderi men oblystyq basqarma basshylaryna qatań túrde jaza qoldanylatynyn eskertti.

«Memlekettik qyzmet kórsetý sapasyn arttyrý – memlekettik saıasattyń basym baǵyttarynyń biri. Sondyqtan bul mindetke salǵyrttyq tanytýǵa bolmaıdy. Osy rette aýdan, qala ákimderi, oblystyq basqarma basshylary elektrondy qyzmetterdiń úlesin arttyrý boıynsha halyqqa qyzmet kórsetý ortalyqtarymen tyǵyz jumys jasaýy qajet», – dedi Janseıit Qanseıituly.

Kún tártibindegi ekinshi másele – oblysqa ınvestısıa tartý boıynsha 7 aıdaǵy atqarylǵan jumystardy saralaý. 2017 jyldyń 7 aıynda negizgi kapıtalǵa tartylǵan ınvestısıa kólemi 229,9 mlrd. teńgeni quraǵan. Bul kórsetkish 2016 jyldyń tıisti kezeńimen salystyrǵanda 131,5 paıyzǵa ósip otyr. Al syrtqy ınvestısıalardyń kólemi 42,2 mlrd. teńgeni qurady.

Sondaı-aq, májiliste mindetti áleýmettik medısınalyq saqtandyrý júıesiniń iske asý barysy talqylandy. Aqparattyq-túsindirý jumystarynyń nátıjesinde oblysymyzda barlyǵy 2 mln.130 myńǵa jýyq halyqqa túsindirý jumystary júrgizilipti. Barlyq aýdan, qalalarda mártebesi belgisiz azamattardy túgendeý jumystary júrgizilip, qazirgi kezde atalǵan azamattardy ózektendirý jumystary qorytyndylanyp jatyr.