Elordada aǵza almastyrý kezeginde turǵan 297 naýqastyń úsheýi bala, dep habarlaıdy Qamshy.kz aqparat agenttigi Astana ákimdiginiń baspasóz qyzmetine silteme jasaı otyryp. 

Sońǵy jyldary el medısınasy eleýli jetistikterge qol jetkizdi. Onyń ishinde transplanttaý salasy qarqyndy damı bastady. Búginde Qazaqstan TMD elderiniń arasynda aǵza almastyrý boıynsha aldynǵy qatarda tur. 

Transplanttaý jónindegi respýblıkalyq úılestirý ortalyǵynyń dırektory Jaqsylyq Dosqalıevtiń aıtýynsha, Qazaqstan boıynsha 4 myńnan astam naýqas aǵza almastyrý kezeginde tur.

Al Astana qalasy boıynsha organ almastyrý kezeginde 297 adam bar. Onyń ishinde 3 balaǵa búırek qajet. Al qalǵan 244 eresek adam búırek, 37 adam baýyr, 7 adam júrek jáne 6 adam ókpe aýystyrýǵa muqtaj.

«Qazaqstan boıynsha aǵza almastyrý otalary 9 medısanalyq mekemede jasalady. Onyń úsheýi osy Astanada. Búginde ol ortalyqtarda júrek, ókpe, baýyr men búırek aǵzalary aýystyrý otalary jasalyp keledi», – dedi J.Dosqalıev. 

Spıkerdiń málimetine júginsek, jyl basynan beri elimiz boıynsha 185 naýqasqa aǵza aýystyrý otasy jasalǵan. Onyń 30 paıyzyna aǵza máıitten alynǵan.

«Aǵza tiri adamnan jáne máıitten alynady. Bir adam qaıtys bolsa da, bes adamnyń ómirin saqtap qala alady. Júrek, baýyr, ókpesi men eki búıregi bes adamnyń ómirin jalǵastyrady degen sóz», – dedi medıa ortalyqtyń tilshisine bergen suhbatynda Transplanttaý jónindegi respýblıkalyq úılestirý ortalyǵynyń dırektory Jaqsylyq Dosqalıev.