Almaty oblysynyń Qarasaı aýdanynda ruqsat etilmegen jerde qordalanǵan qoqys alańy bir aıdyń ishinde tolyqtaı tazartylady. Bul týraly oblys ákimi Amandyq Batalovtyń Qarasaı aýdanyna jasaǵan jumys sapary kezinde bergen tapsyrmasynan belgili boldy, dep habarlaıdy Qamshy.kz aqparat agenttigi Almaty aımaq basshysynyń baspasóz qyzmetine silteme jasap.

Óńir basshysy qazirgi ýaqytta aýmaǵy qorshalyp, jabyq turǵan Jalpaqsaı aýylynda ornalasqan qoqys alańynda bolyp, oblysqa qarasty barlyq aýdan, qala aýmaqtaryndaǵy sanıtarlyq jaǵdaıdy dereý qalpyna keltirýdi tapsyrdy. Jáne de oblystaǵy barlyq ruqsat etilmegen kúl-qoqys alańdaryn joıýǵa baǵyttalǵan sharalardy kúsheıtýdi qatań eskertti.

«Myna qoqys alańynyń kózin tez arada joıý kerek. Atqarylar jumys aýqymdy, desek te barlyq jumystardy bir aıdyń kóleminde aıaqtaýlaryńyz qajet. Osy ispen qatar oblystaǵy barlyq qoqys alańdaryn joıýdy qolǵa alyńyzdar. Osyndaı ashyq-shashyq qoqys oryndary azamattardyń densaýlyǵy men óńirdiń ekologıalyq jaǵdaıyna keri áserin tıgizedi. Sol sebepti atalǵan jumysqa zor jaýapkershilikpen qarańyzdar», - dedi A. Batalov.

Sonymen qatar oblys ákimi aýdandaǵy qoqys alańyn tolyǵymen tazartýmen aınalysatyn «Taýsamaly» MQK qyzmetkerlerin qajetti tehnıkamen qamtamasyz etýdi aýdan basshylyǵyna tapsyrdy. Al oblystyq jáne aýdandyq jaýapty mekeme basshylaryna qandaı da bir orynda osyndaı qoqys alańdary paıda bola bastaǵan jaǵdaıda, dereý habarlaýdy eskertti. Ruqsat etilmegen jerlerde qoqys alańdarynyń paıda bolýyna jol bergen azamattardyń isimen qarjy polısıasy men prokýratýra qyzmetkerleri aınalysatyndyǵyn basa aıtty.

Esterińizge salar bolsaq, ruqsat etilmegen qoqys alańdarynyń máselesin túbegeıli sheshý maqsatynda, oblys aýmaǵynda qoqysty óńdeý salasyn belsendi túrde damytý sharalary qolǵa alynǵan. Máselen, búgingi kúni «Almaty oblysynyń aýmaǵyndaǵy qoqys qaldyqtaryn basqarýdyń óńirlik júıesiniń» tehnıkalyq-ekonomıkalyq negizdemesi ázirlendi. Sonyń sheńberinde memlekettik-jekemenshik áriptestik mehanızmderin qoldana otyryp, 16 qoqys suryptaý keshenin, 13 qoqysty qaıta júkteý stansalaryn, 16 polıgon men 3 qoqys óńdeý zaýytynyń qurylysyn júrgizý josparlanǵan.