Almatyda qoqys óńdeý kesheniniń qurylysy bastaldy. Qala ákiminiń orynbasary Sultanbek Mákejanov Qazaqstandaǵy eń iri keshenniń irgetasyna saltanatty túrde kapsýla saldy, dep habarlaıdy Qamshy.kz aqparat agenttigi.
Nysan Alataý aýdanyndaǵy JEO-2 mańynda boı kótermek.
«Bıznestiń jol kartasy -2020» óńirlik ındýstrıalandyrý kartasyna enetin joba 5,3 mlrd teńge jeke ınvestısıa esebinen salynady.
Mamandardyń aıtýynsha, qoqys óńdeý zaýyty 2025 jylǵa taman salynǵan aqshany aqtaıdy.
Jyl saıyn búdjetke 500 mln teńge quıylyp otyrady. Keshenniń qurylysy men odan arǵy jumys jasaýy barysynda 600 adam jumyspen qamtylmaq.
Jylyna 550 myń tonna qoqys óńdeıtin zaýyt 2018 jyldyń maýsymynda paıdalanýǵa beriledi. Óndiristik qýaty Almaty halqynyń qajettiligin tolyǵymen óteı alady.
«Green Recycle» JSHS dırektory Dmıtrıı Danılchenkonyń aıtýynsha, qoqys sorttaý kezinde jaramdy dúnıeler ekinshi ret óńdeýge jiberiledi, al bıologıalyq turǵydan shirıtin zattar polıgonda kómiledi.
«Almatynyń ózinde 1,5 myń ónerkásiptik kásiporyn baryn eskersek, bul jobanyń mańyzy asa zor ekenin túsinemiz. Sebebi, endi komýnaldy jáne óndiristik qoqysty ıgerý múmkindigi týyp otyr», - dedi Almaty kásipkerlik jáne ındýstrıaldy-ınnovasıalyq damý basqarmasynyń basshysy Almas Mádıev.
Qoqys polıgondarynyń problemasy tek Qazaqstanda ǵana ózekti bolyp otyrǵan joq. Álemdegi damyǵan jáne damýshy elderdiń bárinde bul problema bar. Memlekettiń ekonomıkasy, ónerkásibi qanshalyqty damyǵan saıyn qaldyqtardyń da kólemi arta túsedi. Al, tyǵyryqtan shyǵý úshin Qazaqstanǵa sol damyǵan elderdiń tájirıbesin qoldanǵannan artyq shara joq. Bul turǵyda Qazaqstan úshin «Azıa jolbarysy» atanyp ketken Sıngapýrdyń tájirıbesinen artyǵy joq dep senimmen aıtýǵa bolady. Óıtkeni, atalǵan shaǵyn memleket qoqysty óńdeýmen qatar, odan energıa qýatyn óndirip te shyǵarady. Balamaly energıa kózderin izdep júrgen Qazaqstan úshin bul «bir oqpen eki qoıandy atyp alýdyń» taptyrmas úlgisi.
Kúni keshe Astanada álemdegi tanymal kásipkerlermen, ekonomıs-sarapshylarmen kezdesken Memleket basshysy Nursultan Nazarbaev Qazaqstandaǵy paıdaly qazbalardyń qory 34 mlrd tonnany quraıdy dep, sheteldik ınvestorlardy elge shaqyrdy. Al, Qazaqstanda jınalǵan qoqystyń kólemi sol paıdaly qazbanyń kóleminen de asyp ketip otyr. Bizdiń elge qazir tek paıdaly qazbany óńdeıtin ǵana emes, qoqys óńdeıdin te alyp zaýyttar qajet. Olardy salýǵa óz kúshimiz jetpese shetelden de ınvestorlardy tartýǵa bolady. Tegin qoqystan aqsha jasaý usynysynan bas tartatyndar kóp bolmaıdy dep oılaımyz. Jalpy, bul problemany EKSPO-2017 kórmesi aıasynda da sheshýge bolatyn edi. Alaıda, otandyq ǵalymdardyń eshbiri qoqystan energıa qýatyn alatyn jobany usynǵan joq.
Degenmen, Qazaqstan «jasyl ekonomıka» ıdeıasyn endi ǵana qolǵa ala bastaǵanyn eskersek, elimizde qoqystan energıa óndiretin áli talaı mega-zaýyttyń qurylysy bastalatynyna senimdimiz.
