Almatyda Open Almaty jobasy aıasynda kásipkerlerge arnalǵan HQKO ashylady, dep habarlaıdy Qamshy.kz aqparat agenttigi.

Bul týraly Almatyda ótip jatqan bıznes semınar barysynda aımaqtyq kásipkerler palatasynyń dırektory Iýrıı Tileýmuratov aıtty.

Jıyn barysynda mamandar otandyq eksport kólemin ulǵaıtý men zamanaýı aqparattyq tehnologıalardy qoldana otyryp eksportty jandandyrý máselelerin talqylady.

«Atameken» Ulttyq kásipkerler palatasynyń ókili bolashaqta almatylyq kásipkerlerdi qandaı jańalyqtar kútip turǵanyn aıtty.

«10 kúnnen soń qyrkúıek aıynda ákimdiktiń qoldaýymen Open Almaty aıasynda qoǵamdyq qabyldaý, call-ortalyq ashylady. Birinshi kezek Almaty Taýers ǵımaratynda ashylady. Ákimdiktiń qoǵamdyq qabyldaýynda kásipkerlerdiń kez-kelgen saýalyna jaýap berilip, belgili bir spektrdegi qyzmet kórsetiletin bolady. Ekinshi kezek 1 qańtardan bastap iske qosylady. Munda da barlyq memlekettik organdar, monopolıser kásipkerlerge qyzmet kórsetetin bolady. Iaǵnı, Almatyda kásipkerlerge arnalǵan HQKO ashylady dep aıtýǵa tolyq qaqymyz bar», - dedi Iý.Tileýmuratov.

Sondaı-aq kásipkerlerge Alataý aýdanyndaǵy arnaıy ekonomıkalyq aımaqtyń múmkindikteri aıtyldy. Aımaqta ornalasatyn kásipkerler úshin túpkilikti shyǵyndar azaıtylatyn bolady. Jer ýchaskesiniń 1 sharshy metrin jalǵa alý quny 42 teńge bolmaq. Búginde aımaqta 275,6 ga jer kóleminiń 200 ga aımaǵynda túrli óndirister ashylǵan.

Aımaqtyq kásipkerler palatasy basshysynyń aıtýynsha, qazirgi tańda SHOB sýbektilerin ornalastyrýǵa arnalǵan shaǵyn ındýstrıaldyq aımaqtardyń máselesi qarastyrylyp jatyr.

«Bul barlyq qajetti ınfraqurylymdarmen qamtylǵan jeńildikpen berilgen oryndar bolady. Kásipkerler qural-jabdyqtaryn ákep birden jumysqa kirisip kete alady. Olardyń arasynda jeńil ónerkásip, taǵam ónerkásibi, jıhaz óndirisi bar», - dedi Iýrıı Tileýmuratov.

Aıta ketý kerek, Almaty aımaǵy óńirler arasynda syrtqy saýda kólemi boıynsha - 2 orynda (19,5 %), eksport boıynsha - 6 orynda (7,3%), óńdelgen eksport boıynsha - 3 orynda (12,4 %) tur.

Ótken jyly «Kazakh Invest» málimeti boıynsha Almatydaǵy eksport 2,7 mlrd dollarǵa jetti.

Open Almaty Almaty ákimdiginiń bastamasymen qurylǵan aqparattyq portal. Atalǵan derek qorynan kez-kelgen almatylyq ózine qajetti aqparatty alady.

OPEN ALMATY DEGEN NE?

Bul - qala turǵyndarynyń ómirinde bolyp jatqan jaǵdaılardy ońtaıly sheshýge kómektesip, jergilikti jáne memlekettik atqarýshy bılik mekemeleriniń ashyqtyǵyn, esep berý mindettiligin qamtasyz etetin Almaty qalasy ákimdiginiń biryńǵaı jobasy.

BUL JOBA QASHAN BASTALDY?

Qala turǵyndardyń ómirlik jaǵdaılarynda bolyp jatqan ár-túrli máselelerdi ońtaıly sheshý úshin 2017 jyldyń 10 mamyrynda eń qajetti aqparatty qamtıtyn OpenAlmaty portaly óz jumysyn bastady.

PORTALDA KELESİ ÓTE PAIDALY JÁNE EŃ QAJETTİ AQPARATTY TABÝǴA BOLADY:

Qala anyqtamalyǵy:

• jergilikti atqarýshy mekemeler;

• medısınalyq, bilim berý jáne dinı uıymdar;

• telefon qyzmetteri;

• úkimettik emes uıymdar;

• halyqqa qyzmet kórsetý ortalyqtary;

• PIK (KSK);

• jolaýshylar kóligi (avtoparkter jáne baǵyttar).

Kartalar

• mıkroaýdandar;

• qaıtalama shıkizattardy qabyldaý oryndary;

• jylytý jelilerdi, aýlalardy, joldardy, parkterdi jáne saıabaqtardy jóndeý jumystarynyń josparlary, aıaldamalardy ornatý jospary

Bos jumys oryndar men túıindemeler qory 
Qoldanýshylardyń suraqtaryna jaýaptar

ÓMİRLİK JAǴDAILAR DEP NENİ TÚSİNEMİZ?

Ómirlik jaǵdaılar degenimiz – bizben kúndelikti bolyp jatatyn oqıǵalar. Mysaly: balańyzdy basqa mektepke aýystyrý kerek bolsa, biz ony QALAI jasaýdy aıtamyz. Áleýmettik turǵyn úıdi alǵyńyz kelse, biz ony QALAI jasaýǵa bolatynyn aıtamyz. Jeke bıznesti ashqyńyz kelse, biz ony QALAI jasaýdy aıtyp beremiz. Eger sizdiń máseleńiz sheshilmese nemese qandaı da bir shaǵymdaryńyz bolsa, portalda ótinishti qaldyrýǵa bolady. Osy ótinishke biz mindetti túrde tolyq jaýap berip, tıisti mekemelerge aryz hatty jetkizemiz.