9 qyrkúıekte Astana qalasynda halyqaralyq «EKSPO-2017» kórmesiniń aıasynda ótetin boks keshinde sharshy alańda qazaqstandyq sportshy Janqosh Turarov baǵyn synaıdy. Dúıim qazaq bolyp úmit artyp otyrǵan kásipqoı boksshy qyzý daıyndyq ústinde. Alaıda ýaqytynyń tyǵyzdyǵyna qaramastan Qamshy.kz tilshisine suhbat berdi.
– 9 qyrkúıekte «EKSPO-2017» kórmesi aıasynda Qanat Islam syndy boksshylarmen qatar siz de rıngke shyǵasyz. Daıyndyǵyńyz qalaı júrip jatyr?
– Iá, Alla qalasa, 9 qyrkúıek kúni Qanat baýyrymyz bastaǵan qazaqtyń batyr jigitteri alańǵa shyǵamyz. Jattyǵýymyz joǵary deńgeıde ótip jatyr. Amerıkadan promoýterlerimiz, menedjerlerimiz, jattyqtyrýshylarymyz kelip, bel sybana daıyndalyp jatyrmyz. Sheteldik sportshylar da bar, bilgenderimen bólisip, kómek kórsetip jatyr.
– «EKSPO-2017» kórmesi aıasynda ótetin jekpe-jek elimiz úshin asa mańyzdy bolmaq. Moıyndaryńyzǵa úlken júk artyldy desek te bolady, sebebi dúıim qazaq bolyp sizderge úlken úmit artyp otyr. Ol kúnge de 1 aıdan kem ýaqyt qaldy. Ulttyq namysty qorǵaýǵa, qoldan bermeýge qanshalyqty senimdisiz?
– Rasynda, moınymyzda úlken júk tur. Dúıim qazaq bolyp bizge senim artyp otyrǵan kezde ese jiberseń, qıynnyń qıyny sol bolmaq. Onyń ústine, jarys Astanada ótip jatqan halyqaralyq «EKSPO-2017» kórmesiniń aıasynda ótpekshi, ony qanshama halyq tamashalaıdy, bar álemniń nazarynda. Bul turǵyda bir Allaǵa syıynyp, aldaǵy kezdesýge daıyndalamyz.
Eseni jibermeımin! El bar, jurt bar, «Erteń jeńilseń, eldiń betine qalaı qaraısyń, ne bolmaq?» degen suraqtar mazalap, ózimdi tejeımin, qaıraımyn. Sol oılar daıyndyǵymdy eki esege arttyryp, boıyma kúsh darytady.
– Qarsylasyńyzdyń kim ekeni anyqtaldy ma?
– Anyqtaldy. Qarsylasym – argentınalyq Brýno Leonardo Romeı degen jigit.
– Qarsylasyńyz jóninde tolyǵyraq málimet berip ótseńiz.
– Ol jigittiń kórsetkishi de óte jaqsy. Osyǵan deıin 25 kezdesý ótkizip, 21-in jeńdi, 18-in nokaýtpen jeńgen. Sońǵy 13 kezdesýinde utylmaǵan. Qarsylasyna des bermeıtin myqty jigit desem bolady. WBA muhıtaralyq belbeý sarapqa salynady. Sol kúndi óz basym asyǵa kútip júrmin.
– Kezdesýge daıyndyq úshin AQSH-qa attanǵanyńyz belgili. Nege AQSH? Elimizde kásipqoı boksta jattyǵýǵa múmkindik jasalmaǵan ba?
– Qazirgi daıyndyǵymyz AQSH-ta emes, Astanada ótip jatyr. Amerıkadan promoýterimiz, jattyqtyrýshylarymyz kelip, Astanada daıyndalyp jatyrmyz. Shetelden sparıng-seriktester aldyrdyq, olar jattyǵýymyzǵa kómek kórsetip júr.
– Elimizdiń myqty boksshylarynyń biri Qanat Islammen birge daıyndaldyńyz. Qanat Islamnyń bedeli, abyroıy qazaq halqyna málim. Alaıda halyq ony kóbine Gennadıı Golovkınmen salystyryp jatady. Olardy salystyryp júrgen halyqqa sizdiń aıtaryńyz bar ma?
– Ekeýi de myqty sportshy bolǵandyqtan, halyqtyń salystyratyny belgili. «Kim myqty, kim osal?» degen oılar mindetti túrde týyndaıdy. Ekeýi de osal emes, «Elim, jerim» dep jandaryn salyp, júgirip júrgen jigitter. Bólip jarmaımyn. Qanat Islam da, Gennadıı Golovkın de qazaqtyń týyn, eldiń namysyn kóterip júrgen jigitter, sol sebepti ekeýin salystyryp, eki bólek oı qalyptastyra almaımyn.
– Boksshylardyń bárinde derlik laqap attary bar. Sol attary arqyly álemge tanylyp jatyr. Sizdiń laqap atyńyz áli kúnge deıin joq. Onyń da bir sebebi bar shyǵar?..
– Amerıkada sońǵy kezdesýimde meksıkalyq Gýstavo Garıbaıany jeńgen soń, HBO telearnasynyń qyzmetkeri maǵan bárin joıyp ketetin «tornado» dep aıtqan bolatyn. «Qazaqtyń balasy» degen at qoıyp jatady. Aldaǵy ýaqytta jurt bir esim qoıar, ony da estı jatarsyzdar.
– Osy ýaqytqa deıin 21 kezdesý ótkizip, barlyǵyn jeńispen aıaqtadyńyz. Onyń syry nede? Sizdi alǵa jeteleıtin, úmitińizdi sóndirmeıtin qupıa tásilińizben bólisseńiz... Kásipqoı boksta úlken jetistikke jetýde sportshy úshin ne mańyzdy?
– Iá, Allaǵa shúkir deımin, 21 kezdesý ótkizip, bárin jeńispen aıaqtadym. Jeńisterimniń eshqandaı syry joq. Túbinde mańdaı terim aqqan qanshama eńbek, qıyndyq jatyr. Psıhologıalyq, moraldyq turǵyda óz-ózińdi shyńdap, daıyndap, jattyǵyp, qıyndyqtardyń bárin ótkerip júrgen jaıymyz bar. Sonyń bárin Allanyń ózi kórip, bizge jeńis syılap jatqan bolar.
Meni bıikke, jeńiske jeteleıtin – áke-sheshem, ájem, jubaıym, baýyrlarym. Solarǵa qarap ómirge degen qulshynysym odan saıyn arta túsedi. Meni jeńiske jeteleıtin – osy kisiler.
Sondaı-aq seniń eńbekqorlyǵyń, talantyń, qandaı adamdarmen kezdesetiniń, qandaı jumystar jasalatyny – bári jetistikke aparatyn dańǵyl jol.
– Ýaqytyńyzdyń tyǵyzdyǵyna qaramastan, suhbat bergenińizge raqmet! Sizge úlken úmit artyp otyrǵan qazaq jurtshylyǵynyń senimin aqtaıtynyńyzǵa biz senemiz. Sáttilik joldasyńyz bolsyn!
– Sizderge de kóp raqmet! Alla razy bolsyn!
Suhbattasqan: Gúlim JAQAN
