Májilis tóraǵasy Nurlan Nyǵmatýlın Islam yntymaqtastyǵy uıymynyń ǵylym jáne tehnologıalar jónindegi samıti barysynda Bosnıa jáne Gersegovına Prezıdenttigi Prezıdıýmynyń Tóraǵasy B. Izetbegovıchpen kezdesti, dep habarlaıdy Qamshy.kz aqparat agenttigi Májilistiń baspasóz qyzmetine silteme jasap.

Májilis spıkeri eki el arasynda dıplomatıalyq qatynastyń ornaǵanyna 20 jyl tolǵan jáne Islam yntymaqtastyǵy uıymynyń samıti aıasynda ótip jatqan kezdesýdiń mańyzdylyǵyna toqtala kelip, mártebeli meımannyń bul jolǵy sapary ózara yntymaqtastyqty tereńdetýge yqpal etetinin atap ótti.  

Bosnıa jáne Gersegovına Qazaqstannyń Balqan aımaǵyndaǵy mańyzdy áriptesi bolyp tabylady.

N. Nyǵmatýlın Qazaqstan Prezıdenti Nursultan Nazarbaevtyń táýelsizdik alǵan kúnnen bastap, Azıa elderimen, sonyń ishinde, Islam yntymaqtastyq uıymy aıasynda yqpaldastyqty kúsheıtýge erekshe nazar aýdaryp kele jatqanyn aıtty.

21 ǵasyrdaǵy tehnologıalyq jańalyqtar, bilim jáne ınovasıalyq ǵylym jarqyn bolashaqtyń kepili. Sol úshin Qazaqstan Prezıdenti atalǵan samıtti ótkizý týraly bastama kótergenin alǵa tartqan Májilis tóraǵasy mańyzdy shara IYU múshe-memleketterdiń tamyrlastyǵyn tereńdetýge tyń serpin beretin bolady dedi.

Óz kezeginde B. Izetbegovıch Qazaqstannyń tehnologıalyq joǵary jetistikteri qyzyqtyratynyn jáne eki elder arasyndaǵy áriptestikti nyǵaıtýǵa asa múddeli ekenin jetkizdi.   

Taraptar halyqaralyq jáne parlamentaralyq yntymaqtastyq jaıyna da basa kóńil bólip,  zańnamalyq tájirıbe almasý jaıyn sóz etti.