Syrym aýdanynda qazaq tarıhyndaǵy jarqyn tulǵalardyń biri – Syrym Datulynyń týǵanyna 275 jyl tolýyna oraı mádenı is-sharalar uıymdastyryldy, dep jazady Qamshy.kz aqparat agenttigi.

Sharaǵa oblys ákimi A. Kólginov, Syrym batyr men onyń erligi týraly jazylǵan "Tar kezeń" tarıhı romanynyń avtory, jazýshy Q. Muhambetqalıev, Memlekettik syılyqtyń ıegeri Ánes Saraı jáne bir top ǵalymdar men qonaqtar qatysty. Aldymen qonaqtar "Syrym shyqqan tóbe" eskertkishine gúl shoqtaryn qoıdy. Sondaı-aq jýyrda ǵana "Rýhanı jańǵyrý" baǵdarlamasy aıasynda jóndeýden ótip, qundy jádigerlermen tolyqqan Alash mýzeıin, jańadan ashylǵan Syrym mýzeıin, Alash saıabaǵyn aralady. Keıin baǵdarlama ashyq aspan astynda uıymdastyrylǵan merekelik sharalarmen jalǵasty. 

Asqan batyrlyq, erlik istermen óshpes iz qaldyrǵan zańǵar tulǵanyń ult tarıhyndaǵy erekshe ornyna toqtalyp, jurtshylyqty mereıli toımen quttyqtaǵan oblys ákimi: - Elbasy N.Nazarbaev "Bolashaqqa baǵdar: rýhanı jańǵyrý" baǵdarlamalyq maqalasynda ulttyq sanany serpiltý jaıyn erekshe atap ótti. Tarıhty tanyp, zerdeleý arqyly ǵana keleshegimizdi baǵdarlaýǵa bolatyndyǵyn aıtty.

Sondyqtan el úshin, jer úshin ter tókken tarıhı tulǵalarymyzdyń erligin dáripteý -  bárimizdiń ult aldyndaǵy boryshymyz. Al atqarylyp jatqan is eń aldymen táýelsizdigimizdiń arqasy, - dedi. 
Sondaı-aq kesheli beri Syrym batyrdyń 275 jyldyq mereıtoıyna oraı ótip jatqan  sharalardyń barlyǵy "Rýhanı jańǵyrý" baǵdarlamasymen úndesip jatqanyn aıtty. 

Syrym aýdanyndaǵy aıtýly shara oblystyń óner ujymdarynyń teatrlandyrylǵan qoıylymdary men konserttik baǵdarlamaǵa ulasty. Sondaı-aq at báıgesi uıymdastyrylyp, qazaq kúresinen jeńimpazdar anyqtaldy. 

Aıta ketý kerek, bul toıǵa oblysymyzdyń 12 aýdanynyń barlyǵy atsalysyp, aqshańqaı kıiz úıler tigilgen. Olardyń árqaısysynda aýdan mýzeıindegi qundy jádigerler kópshilik nazaryna usynyldy.