QR Bilim jáne ǵylym mınıstri Erlan Saǵadıev «Saýat ashý» pánine ózgergen «Álippeniń» 2019 jyly qalpyna keltiriletinin aıtty, ― dep habarlaıdy Qamshy.kz aqparat agenttigi.

«Bıyl aıtarlyqtaı ózgerister bolǵan joq, bilim salasyndaǵy eń mańyzdy ózgerister byltyrǵy jyly bolǵan, endi biz sol ózgeristeri ary qaraı jalǵastyratyn bolamyz», ― dep sóz bastaǵan Erlan Saǵadıev barlyq ózgeristerdiń jospar boıynsha jasalyp jatqandyǵyn aıtty.

Sonymen birge Erlan Saǵadıev 1500 muǵalimniń aǵylshyn kýrstaryn bitirip, aǵylshyn tilinde sabaq berip júrgendigin de aıtyp ótti. Erlan Saǵadıevtiń sózine súıensek, 2020 jyly elimizdegi bilim salasy tolyqtaı jańartylǵan mazmunǵa kóshedi eken.

«Oqýlyqtardy ózgertýge 4 jyl saıyn qarjy bólinedi. Iaǵnı, 2015 jyly «Saýat ashý» dep ózgergen pán 2019 jyly qaıta «Álippe» degen ataýmen 0-synyptan bastap oqytylatyn bolady. Balalar «Álippeden» joǵarylap «Ana tilge» kóshedi. Al «Álippeniń» latyn men kırıllısanyń qaısysynda bolatynyn kelesi jyldyń basynda sheshemiz. Biraq biz sozbaımyz», – dedi Erlan Saǵadıev.

Erlan Saǵadıevtiń pikirinshe, qazaqtyń balasy qaı jerde júrse de birińǵaı joǵary, sapaly jáne zamanaýı bilim alý kerek. Sol sebepti 2019 jyldan bastap 10, 11-synypta ınformatıka, hımıa, fızıka jáne bıologıa pánderi aǵylshyn tilinde oqytylady.

Bilim jáne Ǵylym mınıstri grant máseleesine de toqtalǵan bolatyn. Onyń pikiri boıynsha, ár mamandyqqa bólingen grant sany 3 jyl boıy ózgermegende ǵana mektep bitirýshi bundaı tosyn jaǵdaıǵa tap bolmaıdy.

«Ár mamandyqqa ártúrli grant bólinedi. Mysaly, jalpy medısınaǵa 2000 grant bólinse, tis emdeýge 45 grant, pedagogıkaǵa 5000 grant berilse, ekonomıkaǵa 45 grant qana bólinedi. Sóıtip, ekonomıkany oqyǵysy kelgen bala 135 balmen túse almaı, pedagogıkaǵa 65 balmen ótip jatyr. Biz bul máseleni sheshemiz. Altyn belgilerdiń máselesin de depýtattarmen birge talqylap jatyrmyz. Menińshe ár mamandyqqa granttardyń sany 3 jyl buryn belgilenýi kerek. 3 jyl ózgerissiz qalsa balalar da aldyn ala boljap otyrady», – dedi Bilim jáne ǵylym mınıstri Erlan Saǵadıev.