Almatylyqtar 15 qyrkúıek pen 15 qarasha aralyǵynda ótetin tirkeý naýqanyna qatysyp jatqan 78 medısına uıymynyń birine tirkele alady dep habarlaıdy Qamshy.kz aqparat agenttigi.

«Bıylǵy tirkeý naýqanyna qatysyp jatqan 78 densaýlyq saqtaý sýbektisiniń 31-i jeke menshik klınıkalar», - deıdi «Áleýmettik medısınalyq saqtandyrý qory» KEAQ Almaty qalalyq fılıaly dırektory Tileýhan Ábildaev.

«Naýqan kezinde turǵyndar emhana tańdaý quqyǵyn paıdalana alady. Al, medısına uıymdary ár dárigerge túsetin júkteme men 2018 jyly jan basyna shaqqanda  bólinetin qarjy kólemin anyqtaýǵa múmkindik alady. Ol úshin densaýlyq saqtaý sýbektileri osy eki aıda ózderine qansha azamattyń tirkelgenin anyqtap alýy tıis», - deıdi fılıal basshysy.

Azamattar eki túrli tásilmen tirkele alady: jeke kýáligimen emhanaǵa baryp jazbasha ótinish jazady nemese elektrondy úkimettiń egov.kz portaly arqyly tirkeledi.

Al, emhana tańdaý quqyǵyn paıdalanbaǵan turǵyndar emhanaǵa turǵylyqty jeri boıynsha avtomatty túrde tirkeledi.

Tirkeý naýqany týraly tolyq málimetti Medısınalyq saqtandyrý qorynyń fms.kz saıtynan alýǵa bolady. Naýqanǵa qatysyp jatqan medısına uıymdarynyń tolyq tizimi saıttyń «Klınıka tańdaý» bóliminde  ornalasqan.

Esterińizge sala ketsek, Áleýmettik medısınalyq saqtandyrý qory 7 qyrkúıekte densaýlyq saqtaý sýbektileriniń derekqoryn qalyptastyrý jumystaryn bastaǵan. Oǵan memlekettik tapsyrys negizinde halyqqa qyzmet kórsetýden úmitker 1519 medısına uıymy ótinish berdi. Sonyń 193-i Almaty qalasynda ornalasqan.