Batys Qazaqstan oblysynda avtokólikti aıdap ketýshiler azaıar emes, dep habarlaıdy Qamshy.kz aqparat agenttigi  QazAqparat málimetine súıenip.

BQO İİD baspasóz qyzmetinen túsken málimetke qaraǵanda, 20 qyrkúıek kúni Oral qalasyndaǵy Dostyq dańǵylynyń boıynda belgisiz bireý 1988 jylǵy azamatqa tıesili «Folksvagen Passat» avtokóligin aıdap ketken. Jedel izdestirý sharalary barysynda buryn da osyndaı qylmystarymen ishki ister organdarynyń esebinde bolǵan 1994 jylǵy A. degen turǵyn ustaldy.

Sol sekildi 23 qyrkúıek kúni Shyńǵyrlaý aýylynda taǵy bireý meıramhana aldynda turǵan, 1959 jylǵy azamatqa tıesili «Lada-Largýs» kóligin «minip» ketken. Bul iske qatysy bar Oral qalasynyń 1993 jylǵy turǵyny  qolǵa tústi. Urlanǵan kólikter tabylyp, ıelerine qaıtaryldy. Kúdiktilerden eshqaıda ketpeý týraly qolhat alynyp, tergeý amaldary júrgizilýde.

Aıta keteıik, bıylǵy segiz aıda oblys kóleminde 100 avtokólik urlyǵy tirkelgen bolatyn.