Almatyda otasqanyna 50 jyl tolǵan qarıalar qalanyń kórikti jerlerinde boldy. Jastary 80-85-ke kelgen Jetisý aýdanynyń turǵyndary QR Tuńǵysh Prezıdenti parkinde, shańǵy tramplıninde, Abaı atyndaǵy Memlekettik akademıalyq opera jáne balet teatrynda, Arbat jaıaý júrgin alańynda boldy, dep habarlaıdy Qamshy.kz aqparat agenttigi Almaty qalasy ákimdiginiń baspasóz qyzmetine silteme jasaı otyryp.

Bul shara «Bolashaqqa baǵdar: rýhanı jańǵyrý» baǵdarlamasyn júzege asyrý aıasynda Qarttar kúni dekadasyna oraı uıymdastyryldy.

Aýdan ákimshiligi qarttar kúni meıramy qarsańynda jasy kelgen adamdardy qoldaý maqsatynda keshendi is sharalar ótkizbek.

Qazir aýdanda 22 myń zeınetker tirkelgen. Onyń ishinde Ekinshi dúnıejúzilik soǵysqa qatysqan 21 adam, 9 UOS ardageri, 1400 soǵys jyldaryndaǵy tyl eńbegi ardageri, 240 saıası qýǵyn-súrgin qurbany, 3 konslager qurbany  ómir súrip jatyr.

Aýdannyń eń qart turǵyny bıyl 100 jasqa toldy. Láhovıch Antonına Petrovna 1917 jyly dúnıege kelgen.  

«Aýdan ákimdigi jasy egde tartqan qart kisilerdi qurmetteýge, olardy materıaldyq jáne basqalaı qoldaýǵa, jalǵyzbasty qarttarǵa qol ushyn berýge barynsha kóńil bólip keledi. Atap aıtqanda, emhanalarda ashyq esik kúnderi, sporttyq, qaıyrymdylyq sharalary ótedi. Merekelik túski as ótkizip, azyq túlikpen qamtý kózdelgen. Sonymen qatar, aýdanda ornalasqan kásiporyndar men uıymdar qurmetti demalysqa shyqqan qyzmetkerlerin quttyqtap, syılyq taratyp jatyr», - dedi Jetisý aýdany ákiminiń orynbasary Sanjar Toǵaı.