Qazaqstanda ÚEU derekqory - infonpo.kz ınternet-portaly iske qosyldy. Endi, jyl saıyn 31 naýryzǵa deıin elimizdegi barlyq qoǵamdyq uıymdar óz qyzmeti týraly aqparat usynýǵa mindetti,- dep habardaıdy Qamshy.kz aqparat agenttigi.
ÚEU-dyń ashyqtyǵyn jáne qoǵam aldynda ÚEU-dyń qyzmeti týraly aqparattyń qoljetimdiligin qamtamasyz etý maqsatynda úkimettik emes uıymdardyń derekter bazasy qurylǵan bolatyn. ÚEU derekqory arqyly azamattar ÚEU qyzmetine qatysty qajetti aqparatty ala alady, al ÚEU bir-birimen aqparat almasyp, senimdi seriktester taba alady.
Búgingi tańda úkimettik emes uıymdardyń derekqorynda 3 myńdaı qazaqstandyq jáne sheteldik uıymdardardyń tájirıbeleri týraly aqparat kórsetilgen. ÚEU derekqory úkimettik emes uıymdardyń qyzmetiniń ashyqtyǵyn qamtamasyz etý jáne olardyń jumysymen halyqty aqparattandyrý maqsatynda, sondaı-aq memlekettik áleýmettik kelisimsharttardy ornalastyrý, granttar berý jáne júldelerdi taǵaıyndaý sheńberinde paıdalaný úshin qurylǵan aqparattyq derekqor bolyp tabylady.
ÚEU derekter bazasyndaǵy aqparattar jyl saıyn Qazaqstan Respýblıkasy Din isteri jáne azamattyq qoǵam mınıstrliginiń Azamattyq qoǵam isteri Komıtetine jyl saıyn naýryz aıynyń 31-ne deıin usynylýy tıis.
Aqparat kelesideı eki jolmen usynylady: ÚEU derekqorynyń ınternet-portaly arqyly (infonpo.kz) poshta arqyly nemese qaǵaz jáne elektrondy BAQ arqyly taratylady.
Internet-portal arqyly aqparat berý tutastaı jumys prosesin jeńildetedi, esepti toltyrýdyń durystyǵyna yqpal etedi jáne poshta qyzmetine aqy tóleý shyǵyndaryn eseptemeıdi. Aıta ketý kerek, ınternet-portalǵa HQKO-nan (Halyqqa yqzmet kórsetý ortalyqtary) alynǵan uıymnyń ESQ(Elektrondy sandyq qoltańba) kilti arqyly tirkelýge bolady.
Derekqorǵa aqparatty usynbaý, ýaqytynda bermeý, sondaı-aq jalǵan nemese durys emes aqparat bergen jaǵdaıda ákimshilik jaýapkershilikke tartý qarastyrylǵan. Qazaqstan Respýblıkasynyń «Ákimshilik quqyq buzýshylyq týraly» Kodeksiniń 489-1-babyna sáıkes, quqyq buzýshylyq oryn alǵan jaǵdaıda eskertý jasalady, al qaıtalanatyn bolsa 25 aılyq eseptik kórsetkish mólsherinde aıyppul salynady, nemese zań buzýshylyq jasaǵan uıymnyń qyzmeti úsh aı merzimge toqtatylady.
ÚEU derekter bazasyna qatysty kez-kelgen aqparatty «shuǵyl jeli» bolyp sanalatyn 8 (7172) 74-04-28, 74-04-20 telefondaryna qońyraý shalý arqyly bile alasyzdar.
Esterińizge sala keteıik, Qazaqstanda 19 680 úkimettik emes uıym tirkelgen, onyń 13 879-y qazirgi ýaqytta óz qyzmetin belsendi júzege asyrýda.
