Monopolıaǵa qarsy organdar energetıka mınıstri Qanat Bozymbaev atap ótken benzın baǵasynyń kóterilýine sebep bolǵan faktorlardy tekserip jatyr, - dep habarlaıdy Qamshy.kz aqparat agenttigi Tengrinews.kz saıtyna silteme jasap.

"Janar-jaǵarmaı materıaldarynyń baǵasy jaıly. Baǵa jaqynda ǵana kóterildi jáne bul obektıv faktorlarmen baılanysty. Mysaly, elimizdegi munaı ónimderiniń tapshylyǵy, janarmaıdyń 40 paıyzynan kóbi Reseıden ımporttalýy. Reseıde qazir benzın óte qymbat, AI-92 benzıni tonna úshin 560 dollardan asady. Biz monopolıaǵa qarsy organdardyń atynan naryqtaǵy oıynshylardyń barlyǵyna saýal joldadyq. Naryqqa jáne baǵanyń kóterilýine áser etip jatqan faktorlarǵa taldaý jasap jatyrmyz", - dedi ulttyq ekonomıka vıse-mınıstri Serik Jumanǵarın.

Onyń aıtýynsha, baǵanyń joǵarylýyna negiz bar bolsa, Energetıka mınıstrligi ózderiniń saıasaty aıasynda osy máseleni sheship, jańa jyldan bastap Qazaqstandy óziniń munaı ónimderimen qamtamasyz etýi kerek.

"Jazda kóterilgen baǵalar jaıly aıtatyn bolsaq, jaqynda tergeý jumystaryn aıaqtadyq. Janar-jaǵarmaı materıaldaryn kóterme saýda baǵasymen satatyn birneshe iri kompanıa jazalandy. Olarǵa aıyppul salyndy. Qazirgi ýaqytta sot ótip jatyr, olar monopolıaǵa qarsy organdaǵylardyń áreketimen kelispeı jatyr", - dedi Serik Jumanǵarın.

Eske sala keteıik, osyǵan deıin Baqytjan Saǵyntaev monopolıaǵa qarsy qyzmettegilerge benzın baǵasyna qatysty máseleni sheshýdi tapsyrǵan bolatyn.