Almaty túbinde apatqa ushyraǵan sanavıasıa ushaǵynyń bortynda bolǵan dárigerlerdiń aty-jónderi anyqtaldy, - dep habarlaıdy Qamshy.kz aqparat agenttigi QR Densaýlyq saqtaý mınıstrliginiń baspasóz qyzmetine silteme jasap.

Vedomstvo ókilderiniń málimetinshe, 3 qazanda keshki ýaqytta Almatydan Shymkentke dárigerler brıgadasy aýyr jaǵdaıda jatqan júkti áıelge kómektesý úshin attanǵan. 

Olardyń aıtýynsha, Almatydan sanıtarlyq avıasıa brıgadasy saǵat 18.39-da ushyp shyqqan. Bortta Akýsherıa, gınekologıa jáne perınatalogıa ǵylymı ortalyǵynyń profesory, dáriger akýsher-gınekolog Patsaev Talǵat Anapıuly men Kardıologıa jáne ishki aýrýlar ǵylymı-zertteý ınstıtýtynyń reanımatolog dárigeri Artyqbaev Jánibek Túkenuly bolǵan.

Bortta naýqastyń bolmaǵany aıtylady. Ushý Respýblıkalyq sanıtarlyq avıasıa ortalyǵy men East Wing áýekompanıasynyń kelisimsharty boıynsha AN-28 ushaǵymen júzege asyrylǵan. Bortpen baılanys úzilgen. Ushaq Almaty túbinde tabylǵan. Bes adamnyń máıiti tabylǵan.  

"QR Densaýlyq saqtaý mınıstrligi qyzmettik mindetin atqarý kezinde qaza tapqan medısınalyq jumysshylardyń otbasylaryna kóńil aıtady jáne moraldyq ári materıaldyq kómek kórsetedi", - deıdi vedomstva ókilderi. 

Qaza tapqan qalǵan úsheýi, Azamattyq avıasıa komıteti ókilderiniń habary boıynsha, ekıpajdyń músheleri bolǵan. Olar - Qyrǵyzstan azamaty, áýe kemesiniń komandıri G.N.Soı, ekinshi pılot, Qazaqstan azamaty E.Kýtafın.

Eske sala ketsek, 3 qazanda East Wing áýekompanıasynyń AN-28 ushaǵy ushyp shyqqannan keıin 12 mınýt ótkende radardan joǵalyp, keıin ushaq Almaty túbinde órtenip jatqan jerinen tabylǵan. Bortta bolǵan bes adam qaza tapqan.