Qazaqstandyq ánshi Qaırat Nurstas pen jary Juldyz Ábdýkárimova basty róldi somdaǵan «Arman/Kogda angely spát» fılmi 12 qazannan bastap kórermenge jol tartty. Fılm rejıseri Rashıd Súleımenov. Búgingi qoǵamnyń ashshy kelbetin ashyq kórsetýdi nıet etken fılm avtorlary óz maqsattaryna jetti me? Bul suraqtyń jaýabyn kınony tamashalaǵan halyqtyń jarysa jazǵan pikirlerinen-aq saralap qaraýǵa bolady. Fılmniń sátti shyqqanyn aıtyp, Qaırat Nurtasqa rızashylyǵyn bildirip jatqandardyń qatary kóp. Muny áleýmettik jelide jazylyp jatqan pikirlerden baıqaýǵa bolady. Alaıda synnyń astyna alǵandar da joq emes.
Fılmniń tusaýkeserinde bolǵan Baıan Maqsatqyzy: «Ómirdiń shyndyǵyn úlken ekranda alǵash ret kórip otyrmyz. Iá, ras, áıelder qorlyq kórýde, al polısıa buǵan kóz juma qaraıdy. Iá, ras, olıgarhtardyń uldaryna zańnyń qatysy joq, ıá, ras, aqshasy men tanysy joq, ári kinásiz adamdy túrmege toǵyta salý túk emes. Munyń bári – aqıqat! Biraq aıtýǵa eshqaısymyzdyń dátimiz barmaı júrgende, Qaırat aıtty, Qaırat istedi. Bılet satyp alyp, shyndyqqa týra qarańyz!»
Jýrnalıs Abaı Túzelbaı: «Ashshy da bolsa, shyndyq boıamasyz baıandalypty. El ishinde mundaı jaǵdaıdyń túr-túri kezdesip jatyr ǵoı. Biraq, máseleniń kınodaǵydaı sheshilgenin estimegen sıaqtymyn. Qaırat sottaldy, Juldyz kek aldy. Biraq, qalaı? Meniń jazǵan myń sózim, sizdiń kózben kórip, kóńilmen túıgenińizge jetpes. Rıza boldym, Qaırat el maqtaǵandaı ánshi ǵana emes, ájepteýir akter de eken. Al jubaıy Juldyz – naǵyz kásibı maman. Bir tań qalatynym, on jyl ishinde mundaı talantyn tasada qalaı ustady eken? Osynshama óner keýdesine qalaı syıǵan? Búginnen bastap Juldyz Ábdikárimova talaı rejıserden usynys alary sózsiz. Bitken iske synshy kóp. Kınoda kemshilik joq deýge bolmaıdy. Sondyqtan, «Arman... Kogda angely spát...» kınosyna kórermen retinde 10 baldan 9,9 degen baǵa beremin».
Atalmysh kınoǵa orys kórermenderdiń de baǵa bergenin baıqadyq. Natalá Slýdskaıa esimdi almatylyq turǵyn: «Bul jaı ǵana kıno emes, bul áreket. Bul fılm olıgarhtardyń ómiri jaıynda emes, biz jaıynda, bizdiń qoǵam jaıynda... Bılikke jalpaqtaý, múmkindik bolsa, múldem senbeý. Bári óz ornymen qoıylǵan, basqasha sezim, talantty rejıser, shynaıy obrazdar... Aýyrlyǵyna qaramastan ázil-oıyndardy tıimdi paıdalanǵan.
Qaırat, jaraısyń, seni maqtan tutamyn, áıeliń de – óte sulý!».
Teris pikirler de joq emes. Belgili zańger Aıgúl Orynbek fılmniń ıdeıasy urlanǵan deıdi.
«Otandyq ónimdi qoldaý úshin kınoǵa bardyq. Qarjysy kóp Qaırat Nurtasqa myqty kıno túsirý ne turady dep oılaǵan edim ? Biraq ókinishke oraı taǵy da sol kóshirme! Eń soraqysy kıno qatygezdikke tunyp tur. Onsyzda telearnalarymyzda ánshiler qaptap, zorlyq qorlyqty kúnde kórsetip jatqany azdaı, endi kıno túsirip nasıhattaıyn dedi me? Araq sharap iship qyzdy urlap zorlaý, nasha shegý sıaqty dúnıeni túsirip jastarǵa ne tárbıe bermekshi boldy eken? Fılmniń maǵynasyn túsine almadym!
Bireýdiń ıdeıasyn urlaǵan soń fılm maǵynasyz bolǵan. Qaı mektep sabaq ústinde "Astana" arnasyn qosyp qoıyp, jańalyqtar kóretinin maǵan kórsetińdershi? Zańdy túrde shara qoldanaıyq . Myltyqpen túngi klýb nemese meıramhanaǵa kirip bara jatqanda kúzetshiler qalaısha jiberip qoıdy? Baıdyń balalary otyratyn qymbat restorandy bul fılmde eshkim kúzetpeı qoıǵan ba? Jigitterdi atamyn dep stol janyna kelip, myltyqty kezengende nege qalǵan qonaqtar jaıbaraqat bılep júr? Jaza bersem kóp! "Osy bizdiń qazaqqa eshteńe jaqpaıdy" - dep renjýi múmkin Qaırattyń anasy. Biraq kıno túsirer aldynda syn bolatynyn bildi ol kisi. Gúlzıra hanym siz anasyz, onsyz da zorlyq pen qorlyǵy kóbeıgen zamanda, jastarǵa meırimdilik nasıhattaıtyn, mán-maǵynasy bar kıno túsirý sizdiń qolyńyzdan keledi. Qoldaryńyzda Juldyz sıaqty myqty aktrısa qyz turǵanda sizder úshin bul qıyn emes dep oılaımyn. Al myna fılmderińizge eki degen baǵa berem!», dep keltirdi óz pikirin zańger.
Aıta keteıik, 2013 jyly ánshi «Ókinish» atty alǵashqy kıno týyndysyn kórermenge usynǵan. Sol jyldyń 11 sáýirinen bastap shyqqan fılm eki kúnde 34,8 mıllıon teńge qarjy jınaǵan.
