Syrtqy qolaıly jaǵdaılar jáne qysqa merzimdi aýytqýlardy retteýge baǵyttalǵan Ulttyq Bank sharalarynyń nátıjesinde qol jetkizilgen valúta naryǵyndaǵy ahýaldyń turaqtylyǵy týraly QR Parlamentiniń Senat otyrysynda baıandamamen sóz sóılegen Ulttyq Bank Tóraǵasynyń orynbasary Oleg Smolákov aıtyp berdi, dep habarlaıdy Qamshy.kz aqparat agenttigi Ulttyq banktiń baspasóz qyzmetine silteme jasap.
«Aıyrbastaý baǵamy 8 qarashadaǵy jaǵdaı boıynsha bir AQSH dollary úshin 333,76 teńgeni qurady. Ulttyq Bank teńgeniń erkin ózgermeli aıyrbastaý baǵamy rejımi saqtalǵan jaǵdaıda ınflásıalyq targetteý saıasatyn ustanýdy jalǵastyrady. Ulttyq Bank qyzmetindegi negizgi maqsat – bul baǵa turaqtylyǵyn qamtamasyz etý jáne jyldyq ınflásıany belgilengen nysanaly dıapazon sheńberinde ustap turý», - dedi O.Smolákov.
Onyń aıtýynsha, ınflásıa 2017 jylǵy on aıda 5,4%-dy qurady. Qazanda jyldyq kórsetkish boıynsha ınflásıa 2017 jylǵa belgilengen 6-8% dáliz ishinde bolyp, 7,7%-dy qurady. Baǵa turaqtylyǵyn qamtamasyz etý úshin qajetti sharalardy Ulttyq Bank tolyq kólemde qoldanýda. Ekonomıkanyń uzaq merzimdi ornyqty ósýi jáne halyqtyń ıgiligin arttyrý baǵa turaqtylyǵynyń negizi bolyp tabylady.
Sonymen birge O.Smolákov aqsha qunynyń negizgi ındıkatory bazalyq mólsherlemeniń máni qazirgi ýaqytta 10,25%-dy quraıtynyn atap ótti. O.Smolákov 2017 jyldyń 9 aıynda Ulttyq Banktiń halyqaralyq rezervteri 32,2 mlrd. AQSH dollaryn qurap, 9,1%-ǵa ulǵaıǵanyn aıtty. Ulttyq qordyń valútalyq aktıvteri 57,1 mlrd. AQSH dollaryn quraıdy, al el rezervteriniń jalpy somasy İJÓ-niń 60%-yn quraı otyryp, 89,3 mlrd. AQSH dollary boldy.
«Depozıt naryǵynda shetel valútasyndaǵy salymdar úlesiniń jyl basyndaǵy 55%- dan qazirgi kezdegi 49%-ǵa deıin tómendeýi baıqalýda. Valúta naryǵyndaǵy turaqtylyq jáne ınflásıa deńgeıiniń tómendeýi teńgemen jınaqtaýdy odan ári yntalandyratyn bolady. Jyldyń basynan beri bankterdiń ekonomıkaǵa kredıtteriniń kólemi 13,2 trln. teńgege deıin 4%-ǵa ósti. Ulttyq valútamen kredıtter berý kólemi 11%-ǵa (906,5 mlrd. teńgege) nemese 9,5 trln. teńgege deıin ulǵaıdy. Kredıtter boıynsha ortasha alynǵan mólsherleme qyrkúıekte 14%-ǵa deıin tómendedi», - dedi O.Smolákov.
Qorytyndylaı kele ol bankterdiń turaqtylyǵyn qamtamasyz etý boıynsha belsendi jumys jalǵasyp jatqanyn atap ótti: «Bankterdi qalypqa keltirý jáne ekonomıkany kredıtteýdi jandandyrý úshin yntalandyrý qazirgi sátte júrgizilip otyrǵan Bank sektorynyń qarjylyq ornyqtylyǵyn arttyrý baǵdarlamasynyń nátıjesi bolady».
