Iraktaǵy Kúrdistan turǵyny Nadá Mýrad aýylynyń kúl-talqanyn shyǵarǵan DAISH sodyrlarynyń qolyna túsken. Sodyrlar Nadány uzaq ýaqyt zorlap, azaptaǵan. DAISH-tyqtardan qashqannan keıin Nadá BUU-nyń elshisi atandy. Nadá Mýrad Nobel syılyǵyna usynylyp, Time jýrnalynyń reıtıńisine kirdi. Nadá óz oqıǵasyn qaǵaz betine túsirip, kitap etip shyǵardy.
Nadá Mýrad 11 balanyń eń kishisi. Ol óz sulýlyq salonyn ashýdy armandady. Nadá qolyna kamera alyp Iraktyń soltústik-shyǵysyndaǵy kishkentaı aýylda qalyńdyqtardy fotoǵa túsirip, shash úlgisi men makıajdyq eń ádemisin tańdaýdy unatatyn.
Ókinishke qaraı, onyń armany oryndalmady. 2014 jyldyń tamyz aıynda aýyldy DAISH sodyrlary basyp aldy. Nadá tutqynda boldy. Ony birneshe márte satyp, zorlap, azaptaǵan. 24 jastaǵy Nadá qanpezerderden qashyp kete aldy.
«The Last Girl: My Story of Captivity and My Fight Against the Islamic State» kitabynda Nadá Sırıamen shekaralas Kocho aýylyndaǵy baqytty ómiri qalaı Jerdegi tozaqqa aınalǵanyn baıandaıdy.
DAISH-tyqtar eki apta kúresten keıin aýyldy qorshaýǵa alyp, turǵyndardy mektep aýlasyna jınap, ezıdızmnen bas tartyp musylman bolýǵa shaqyrdy.
Aıta keteıik, ezıdızmde hrıstıandyq, musylmandyq jáne ıýdaızm elementteri bar. Ezıdızıtter bir qudaıǵa jáne 7 perishtege senedi. Perishtelerdiń eń bastysy – Malak Tavýs dep esepteıdi. Bul dindi alǵash taratqandardyń biri Sharfadın dep esepteledi.
Turǵyndardyń eshqaısysy óz dinderinen bas tartpady. Sol kezde sodyrlar er adamdarǵa ózderine qabir qazýdy buıyrdy. DAISH sodyrlary er adamdardyń barlyǵyn óltirdi. Al jas áıelderdi ózderimen alyp ketti. Olardyń arasynda 21 jastaǵy Nadá da bar. Sodyrlar onyń endi DAISH múligi ekenin jáne jynystyq quldyqta bolatynyn aıtqan. Al komandırlerdiń biri onyń ishi men ıyǵyn temeki shoǵymen kúıdirgen.
Nadá ózimen taǵdyrlas qyzdardy kórdi. Olardyń barlyǵy derlik ózine qol jumsaýǵa daıyn bolǵanyn aıtady. Qyzdardy erekshe kózge túsken sodyrlarǵa berip otyrǵan.
Nadá buǵan deıin eshqashan DAISH týraly estimegen jáne onyń taǵdyry terorıstik top aýyldy basyp alǵanǵa deıin sheshilip qoıǵanyn da bilmedi.
«Olar barlyǵyn josparlap qoıǵan. Qashan shabýyldaıdy, qansha qyzdy quldyqqa alyp ketedi. Qansha soldatqa qyzdar beriledi jáne quldyqtaǵy qyzdardyń syrt kelbetine baılanysty qansha aqshaǵa satatynyn da belgilep qoıǵan» deıdi Nadá.
DAISH sodyrlary jynystyq quldyqtaǵy áıelderdi bireýge syılaı alǵan nemese «qojaıyny» qalasa satyp jiberip otyrǵan. Tipti kámeletke tolmaǵan qyzdardy jynystyq quldyqta ustaǵan.
Nadá basqa qyzdar sekildi ózine qol jumsaýdy emes, tutqynǵa túsken ápkelerimen qashýdy josparlady.
İri deneli kisi bólmege kirip, Nadány quldyqqa tańdaǵan. – Ol qubyjyqqa uqsaıtyn, - dep eske alady Nadá. Keıinirek ol kishirek sodyrdy ózin quldyqqa alýǵa kóndirgen.
Nadáǵa onyń qul ekenin kýálandyratyn qujat jasatyldy. Odan keıin ol ózin satyp alǵan Hadjı Salman esimdi er adamnyń úıine kóship bardy. Ol DAISH-ta sýdıa qyzmetin atqaratyn.
«Sen meniń tórtinshi qulymsyń. Saǵan deıingi úsheýi ıslamdy qabyldady. Biz munyń barlyǵyn ezıdter úshin jasadyq. Biz senderge shynaıy senimdi tabýǵa kómektesemiz» dedi ol.
Bir kúni Nadá qashpaq bolǵan. Terezeden jippen túskende ony kúzetshilerdiń biri kórip qoıǵan. Ol qojaıynyna habarlasyp, mán-jaıdy aıtyp bergende, Hadjı Salman úıge kelip 6 kúzetshige kezektesip Nadány zorlaýǵa buıryq bergen.
Ony bir apta boıy uryp-soǵyp, zorlaǵan. Odan keıin Hadjı Salman ony basqa sodyrǵa satty. Ol Nadány Sırıaǵa alyp ketpek boldy. Biraq, kóshý ýaqyty keıinge shegerilgendikten Nadány biraz ýaqyt eshkim mazalamady. Bir kúni estiktiń biri ashyq qaldy. Nadá sol sátti paıdalanyp qashyp ketti.
Nadá parandja kıdi. Sondyqtan eshkim odan kúdiktenbedi. Biraq, Nadá jol boıy qatty qoryqqanyn aıtady. Nadá kúni, túni júrip eń kedeı Mosýl aýdanyna jetti. Óz úıine uqsaıtyn úılerdiń biriniń esigin qaǵyp, kómektesýdi ótindi. Sol ýaqytta bireý esikti ashyp, ony dereý úıge kirgizgen.
Nadányń joly boldy. Ol DAISH saıasatyna qarsy adamdar turatyn úı bolyp shyqty. Olar Nadá búkil álemge DAISH sodyrlarynyń áıelderge jasap jatqan jaýyz áreketterin aıtý úshin onyń qashý operasıasynyń josparyn qurdy. Nadáǵa jalǵan qujat jasatyldy. Nadány qutqarýshylardyń biri Nasser shekaraǵa deıin ony óz kóligimen jetkizdi. Jolda toqtatqandarǵa Nadányń áıeli ekenin aıtqan.
Onyń joly bolyp, jospar iske asty. Nadá bosqyndarǵa arnalǵan lagerge jetkende aǵaıyndarmen kezdesti. Alaıda munda ony jaman habar kútip turǵan edi. Onyń anasyn atyp tastaǵan eken. Al 5 aǵasyn azaptap óltirgen. Jıeni DAISH qataryna qosylǵan, eki ápkesi áli quldyqta eken.
Nadá tiri qalǵan aǵalaryna jynystyq quldyq týraly aıtpady. Sebebi sodyrlar ustap áketken áıelderiniń taǵdyry týraly oılap, qaıǵyrǵanyn qalamady. Biraq kóp uzamaı lagerde jumys isteıtin reporterler óz oqıǵasy týraly aıtyp berýge kóndirdi. Bir jyl ótkennen keıin ol BUU-da DAISH sodyrlarynyń áıel quqyǵyn qalaı taptaıtynyn aıtyp baıandama jasady.
Qazir ezıdterdiń 3 myńnan astam áıeli men balalary sodyrlardyń qolynda. Nadányń ápkeleri quldyqtan bosatyldy.
2016 jyly BUU-nyń esirtki men qylmysqa qarsy basqarmasy adam saýdasy týraly aqparat taratqany úshin Nadány elshi etip saılady. Sonymen qatar, Nadá Nobel syılyǵyn aldy jáne "Taım" jýrnalynyń nusqasy boıynsha 2016 jyldyń eń yqpaldy adamdarynyń qataryna kirdi.
«Men jazǵan kitap halyqtyń DAISH-tyń qanǵa boıalǵan qolynan qutylýyna yqpal etedi dep senemin. Qudaı maǵan olardan qashýǵa múmkindikti bosqa bermedi ǵoı. Ár mınýtymdy men osy jaýyzdyqqa qarsy kúreske arnaımyn» dep sózin túıindedi Nadá.
