Jyl saıyn qarashanyń 19-ynda Qazaqstannyń Qarýly Kúshterinde Zymyran áskerleri men artılerıa kúni atap ótiledi. Iaǵnı, tarıhqa engen osy aıtýly kúndi búgingi kúnge deıin tek Qazaqstan Respýblıkasy Qarýly Kúshteriniń Zymyran áskerleri men artılerıasy ǵana emes, kóptegen Keńes úkimetiniń quramynda bolǵan memleketter dástúrli mereke retinde qarastyrady.
Atalmysh kásibı mereke memlekettiń qorǵanysy men qaýipsizdigin qamtamasyz etý mindetterin sheshýdegi áskerı mamandardyń zor eńbegin moıyndaý nyshany ispetti.
Jalpy, QR QK Zymyran áskerleri men artılerıasy QR Prezıdentiniń 2003 jylǵy 7 mamyrdaǵy Jarlyǵymen quryldy.
Qazaqstandyq armıanyń Zymyran áskerleri jáne artılerıa qarsylasty atyspen zaqymdaýda tapsyrmalardyń negizgi kólemin oryndaıtyn Qurlyq áskerleriniń negizgi oq atýshy kúshi bolyp tabylady. Atalmysh ásker túriniń ereksheligi joǵary manevrlik, dáldik, jyl, táýlik mezgili, aýa raıy jáne taǵy da basqa jaǵdaılarda soqqy tıimdiligi táýeldiliginiń bolmaýy bolyp tabylady. ZÁjA taktıkalyq zymyrandardyń quramalarynan, gaýbısalyq, zeńbirektik, reaktıvti jáne tankige qarsy artılerıadan, artılllerıalyq barlaýdan, mınaatqysh jáne tankige qarsy bólimshelerden turady. Qazirgi ýaqytta barlyq desanttyq-shabýyldaý batalóndarynda mınaatqysh batareıalary tireýish taqtaıshasyn almastyrýsyz 360 gradýsqa atysty júrgizýge múmkindik beretin 2015 jyly shyǵarylǵan 82 mm 2B24 «Deva» jańa zamanaýı mınaatqyshtarǵa qaıta jaraqtandyrylǵan.
QR QK Zymyran áskerleri men artılerıasynyń jeke quramy jaýyngerlik jáne dene daıarlyǵynyń joǵary deńgeıin pash ete otyryp, ártúrli qazaqstandyq jáne halyqaralyq oqý-jattyǵýlarǵa belsene qatysady. Munyń aıqyn dáleli retinde atalǵan ásker túri Armıa halyqaralyq oıyndaryndaǵy «Artılerıalyq oq atý sheberleri» baıqaýynda sátti óner kórsetip, birinshi oryndy enshilegen bolatyn. Ózderiniń kásibı daıyndyqtary men jaýyngerlik mashyqtaryn udaıy jetildirip otyrǵandarynyń arqasynda QR QK Zymyran áskerleri men artılerıasy QR QK Joǵarǵy Bas Qolbasshysy qoıǵan tapsyrmalardyń ýaqtyly jáne sapaly oryndalýyna kepil beredi.
Qazaqstan qorǵanys salasynyń 25 jyldyq tarıhynda mańyzdy birden bir ásker túri – QR QK zymyran áskerleri men artılerıasy. Derbestigin osydan 14 jyl buryn naqtylaǵan QR QK zymyran áskerleri men artılerıasy (QR Prezıdentiniń 2003 jylǵy 7 mamyryndaǵy №1085 Jarlyǵy negizinde qurylǵan) búgingi tańda qarýly kúshtiń qýatyna aınaldy.
Zamanaýı jabdyqtalǵan ári mashyqtanǵan áskerimizdiń kún ilgerigen saıyn áleýeti artyp keledi.
