Almatyda Sh.Aımanov atyndaǵy «Qazaqfılm» kınostýdıasynda Qazaqstan Respýblıkasy Májilis Parlamenti depýtattary Qazaqstan kınematografısteri, kınostýdıa qyzmetkerleri jáne zıaly qaýym ókilderimen kezdesý ótkizdi dep habarlaıdy Qamshy.kz aqparat agenttigi. 

Otandyq kınoındýstrıa ókilderimen kezdesýge Qazaqstan Respýblıkasy Májilis Parlamenti depýtattary, «Nur Otan» partıasy fraksıasynyń músheleri: Gúlnar Iqsanova, Káribaı Musyrman, Beıbit Mamraev, sondaı-aq, Almaty qalalyq maslıhaty depýtaty Islam Baıramýkov, Almaty qalasynyń Bostandyq aýdany ákiminiń orynbasary Marjan Balbaeva keldi.

- Kınematografıa salasyn quqyqtyq turǵyda retteý, ulttyq kınoóndiriske qoldaý jáne damýyna yńǵaıly orta qalyptastyrý men ulttyq fılmderdiń prokaty jáne dıstrıbýsıasyn qadaǵalaý, otandyq kınomyzdyń sapasyn kóterip, básekege qabilettiligin arttyrý úshin zań qajet.  Osy oraıda, ortaqtasyp oń nátıje shyǵarý úshin biz sizdermen arnaıy kezdesýge kelip otyrmyz, - degen Gúlnar Iqsanova sózin bylaı dep jalǵastyrdy, – jáne eń bastysy, bul zań jobasyn talqylaýǵa bizdiń saıt arqyly, elimizdiń kez-kelgen azamaty qatysa alady.

– Ótken jyldyń aıaǵynda mádenıet jáne sport mınıstrligi parlament otyrysynda kınematografıa týraly zań jobasyn usynǵan edi. Qazir biz ony jan-jaqty talqyǵa salyp otyrmyz. Biz sizder – kınematografısterdi – osy talqylaýǵa ekspert retinde qatysýǵa shaqyramyz. Qatyssańyzdar, biz tek qýanamyz, óıtkeni zańda otandyq kınematografıa týraly barlyq máseleler qarastyrylǵanyn qalaımyz, - dedi Beıbit Mamraev.

Kezdesý barysynda depýtattar «Qazaqfılmniń» kúndelikti jumysy jáne tehnıkalyq jabdyqtarymen, dekorasıalarymen, kostúmderimen, rekvızıtterimen tanysty.

Kezdesýdiń basty taqyryby Parlamentte talqylanyp jatqan, otandyq kınoındýstrıanyń bolashaqtaǵy damýyndaǵy negizgi baǵyttary kórsetilgen «Kınematografıa týraly» zań jobasy boldy. Sondaı-aq, kezdesýde elimizdiń áleýmettik-mádenı ómirinde otandyq kınematografıanyń alatyn orny men maqsattary, búgingi jaǵdaıy men otandyq kınoónerdiń keleshegi sóz etildi.

Otyrysta tanymal rejıserler, akterler jáne prodúserler qajetti ózgerister týraly óz oılaryn ortaǵa saldy. Dálirek aıtatyn bolsaq, rejıser Rústem Ábdirash sosıalısik elder qatarynda bolǵan Vengrıa men Bolgarıanyń ulttyq kınematografıasyn saqtap qala otyryp, gollıvýdtyq stýdıalarmen qarym-qatynas ornata alǵanyn mysalǵa keltirdi. Akter Nurjuman Yqtymbaev «Qazaqfılm» kınostýdıasyn biryńǵaı jáne biregeı kınematografıalyq kompleks retinde saqtap qalý kerektigin aıtty. Al kınorejısser Satybaldy Narymbetov pen jazýshy, kınodramatýrg Smaǵul Elýbaı otandyq áleýmettik mańyzy bar kınonyń kóptegen elderde memlekettik deńgeıde qoldaý kórsetiletini týraly jáne ıdeologıalyq mańyzy bar fılmderdiń óskeleń urpaqty tárbıeleýde mańyzy zor ekenin basa aıtty.

– Búginde «Qazaqfılm» kınostýdıasy  – ulttyq brend jáne Qazaqstan kınoındýstrıasynyń qozǵaýshy kúshi. Biz – Qazaqstannyń kınematografısteri elimizdiń «Kınematografıa týraly» zańyn kútip júrgenimizge kóp boldy. Bul zań: kınematografısterdiń, kıno óndirýshilerdiń, prokachıkterdiń, dıstrıbútorlardyń jumysyn rettep otyrady, kıno ındýstrıanyń ekonomıkalyq tetikteriniń damýyn qalyptastyrýǵa múmkindik beredi. Sonymen qatar salyqtyq artyqshylyqtar, kedendik jeńildikter jáne memlekettik sýbsıdıalaý mehanızmi sıaqty naryqtyq mehanızmder arqyly jaǵymdy ınvestıalyq klımat qalyptastyrady, - dedi jıynnyń sońynda sóz alǵan Sh.Aımanov atyndaǵy «Qazaqfılm» kınostýdıasynyń prezıdenti Baqyt Qaıyrbekov.