2018 jyldaǵy Úkimettiń alǵashqy otyrysynda QR Premer-mınıstri Baqytjan Saǵyntaev Elbasynyń Joldaýyna qatysty birqatar tapsyrmalar júktedi, dep habarlaıdy Qamshy.kz aqparat agenttigi.
«Keshe memleket basshysynyń «Tórtinshi ónerkásiptik revolúsıa jaǵdaıyndaǵy damýdyń jańa múmkindikteri» atty Qazaqstan halqyna Joldaýy jarıalandy. Sondyqtan, biz búgin Joldaýdaǵy tapsyrmalardy oryndaýǵa jaýapty memlekettik organdardy naqtylap alyp, mańyzdy qujatty iske asyrý úshin qajetti sharalardyń barlyǵyn qabyldaýymyz qajet. Jańa Joldaý Elbasymyz 2017 jyly jarıalaǵan «Qazaqstannyń úshinshi jańǵyrýy» tuǵyrnamasyn ary qaraı damytady. Maqsatymyz ózgerissiz qala bermek.
Ol - búkil álemniń jańa tehnologıalyq qurylysqa kóshýi jaǵdaıynda eń damyǵan otyz eldiń qataryna kirý.
Memleket basshysynyń tapsyrmasy boıynsha Úkimet elimizdiń 2025 jylǵa deıingi damýynyń strategıalyq josparyn jáne ilgeri basýymyzǵa birqatar baǵdarlamalyq qujattardy daıyndady. Jańa Joldaý atqarýshy bıliktiń aldyna «Tórtinshi ónerkásiptik revolúsıa» usynyp otyrǵan jańa múmkindikter men odan keletin qaýip-qaterlerge elimizdiń sátti beıimdelýi úshin osy jyldan qalmaı sheshilýi tıis naqty mindetterdi qoıyp otyr», -dedi B. Saǵyntaev.
Osy oraıda Úkimet basshysy Prezıdent óziniń Joldaýynda on negizgi maqsatty belgilegenin jáne olardyń barlyǵy jaqyn bolashaqta júzege asyrylýy qajettigin atap ótti.
«Birinshi basymdyq ındýstrıalandyrý men jańa tehnologıalardy engizýge qatysty. Investısıalar jáne damý mınıstrligi múddeli memlekettik organdarmen, uıymdarmen birlese ónim eksporty men tehnologıalar transfertine ekpin qoıa otyryp, otandyq kásiporyndardy jańǵyrtý men sıfrlandyrýǵa baǵyttalǵan jańa tetikterdi ázirleýi qajet», - dep atap ótti Úkimet basshysy.
Osy oraıda qanatqaqty jobalardy aıqyndap, olardy iske asyrýǵa kirisý júkteldi. Bul baǵyttaǵy jumystarǵa Investısıalar jáne damý mınıstri Jeńis Qasymbek jaýapty bolady.
Aqparat jáne komýnıkasıalar mınıstrligi tıisti memlekettik organdarmen birge sharalar keshenin daıarlaýy tıis. Damý boıynsha sıfrlyq ári ınovasıalyq sheshimderdi daıarlaý turǵysyndaǵy sharalarǵa Nazarbaev Ýnıversıteti, «Astana» halyqaralyq qarjy ortalyǵy, IT-startaptar halyqaralyq tehnoparki qamtylmaq.
Sonymen qatar, bul baǵytta zańnamalyq túzetýlerdi qamtamasyz etý tapsyryldy. «Alataý» ınovasıalyq tehnologıalar parkiniń budan keıingi qyzmeti boıynsha Investısıalar jáne damý mınıstrligi Aqparat jáne komýnıkasıalar mınıstrligimen, Almaty ákimdigimen eki aptalyq merzimde naqty usynystar engizýi tıis.
Investısıalar jáne damý mınıstrligine ındýstrıalandyrýdyń úshinshi bes jyldyǵy memlekettik baǵdarlamasynyń jobasyn ázirleýge kirisýi qajet. Osy oraıda sıfrlyq tehnologıalarǵa ekpin qoıylýy kerek», - dedi B. Saǵyntaev.
