Aqmola oblysynda aýyl turǵyndary jetimderdi jappaı asyrap alyp jatyr, dep habarlaıdy Qamshy.kz aqparat agenttigi KTK arnasyna silteme jasaı otyryp.

Aqmola oblysyndaǵy Qoshqarbaı aýyly 11 jetkinshekti bir kúnde baýyryna basty. Osylaısha, olar jáýteńkóz balalardyń da, aýyldyń taǵdyryn da óz qoldarymen sheshti. 60 úıli aýyl keshikpeı taǵy birneshe jetim balaqaıdy aýyl tárbıesine tartpaq.

Dálirek aıtsaq, aýyl halqy bir sátte aýyl mektebi jabylady degende qatty ýaıymdaǵan. Sóıtip, biraýyzdan kelisimge kelgen. Jetimderdi baýyrǵa basyp, ata-analyq meıirimge bóleý tyǵyryqtan shyǵar jol dep tapqan. Shynymen de, 6 otbasy baryp 11 balany asyrap alǵanda aldymen oılaǵandary tek aýyldy qutqarý edi. Biraq bul balalar qazir óz balamyzdan kem emes deıdi olar.

"Ózimniń týǵan 4 balam bar. Soǵan qaramastan balalar úıinen 3 bala alyp keldik. Basynda joldasym ekeýmizde bir kelispeýshilik boldy. Ol maǵan ul alyp kel dedi, joq men qyz alyp kelem degenmin. Balalar úıine barsaq, bir súıkimdi balalar kózderi jadyrap, ádemi bolyp kúlimdep turǵan. Óz balalaryma uqsap ketti", — deıdi Qoshqarbaı aýylynyń turǵyny Gúlnár Baımahanova.

Aýyl mektebinde qazir 40 oqýshy bar. Bala sany shaǵyn bilim oshaǵyn ustaýǵa jetken soń ol jabylmaıtyn bolyp sheshilgen. Eń bastysy, aýdan ortalyǵyndaǵy balalar úıinde tek daıynǵa úırengen jetkinshekter endi aýyl ómirine kóndigip qalǵan.

Aýyl turǵyndary shynymen ıgi istiń jalǵasýyn kútedi. 11 balany  negizinen mektep muǵalimderi asyrap alypty. Qazir Qoshqarbaıdyń basqa turǵyndary da balalar úıine jıi baryp júr.