Elbasy Nursultan Nazarbaev Ulttyq bank tóraǵasy Danıar Aqyshevpen kezdesti, dep jazady Qamshy.kz aqparat agenttigi Aqorda málimetine súıenip. 

Kezdesý barysynda Qazaqstan Prezıdentine Ulttyq banktiń 2017 jyly atqarǵan jumysynyń qorytyndysy jónindegi esebi usynyldy.

Danıar Aqyshev Elbasyǵa Ulttyq banktiń qazirgi qyzmeti, aqsha-nesıe saıasatynyń basty baǵyttary, sondaı-aq elimizdiń qarjy naryǵyndaǵy ahýal týraly baıandady.

Ulttyq bank tóraǵasynyń esebine sáıkes, 2017 jyly ınflásıa deńgeıi 7,1 paıyzdy qurap, jyl sońynda altyn-valúta qorynyń kólemi 30,7 mıllıard AQSH dollaryna jetken.

– Qańtar aıynda ahýal odan da jaqsara tústi. Bank rezervteri taǵy 3 paıyzǵa ósip, 31,7 mıllıard AQSH dollaryna jetti. Ulttyq qordyń shetel valútasyndaǵy aktıvteri 58,3 mıllıard AQSH dollaryn qurady. 2018 jylǵy qańtarda ınflásıa deńgeıi 0,6 paıyz boldy. Bul bizdiń bıylǵa belgilegen – besten jeti paıyzǵa deıingi aralyqtaǵy jańa ólshemimizge enip otyr, – dedi D.Aqyshev.

Kezdesý qorytyndysy boıynsha Memleket basshysy birqatar naqty tapsyrma berdi.