Qytaıda 120 myńǵa jýyq musylman-uıǵyrdy Shyńjań Uıǵyr avtonomıalyq aýdany Qashqar qalasyndaǵy saıası oqytý lagerlerine jiberip jatyr. Bul jaıynda Qamshy.kz aqparat agenttigi CNN portalynyń málimetine súıene otyryp habarlaıdy.

Turǵyndarynyń basym bóligi ıslam dinin ustanatyn Qytaıdyń eń iri aımaǵynyń birinde QHR bıligi saıası lagerler quryp, on myńdaǵan uıǵyrdy oqytyp jatyr. Ol jerde musylman-uıǵyrlar revolúsıalyq ánder aıtyp, KHR basshysy Sı Szınpınniń negizgi oılarymen tanysady jáne olar qytaı tilinde sóıleýge májbúr.

Bıliktiń bul isine qatysty adam quqyǵyn qorǵaıtyn belsendiler túrli synı pikir bildirip jatyr. «Ár aýladan, ár otbasydan úsh-tórt adamnan alyp ketip jatyr. Keıbir aýyldarda, kóshelerde birde-bir er adam joq, tek áıelder men balalar qalǵan, er adamdardyń barlyǵyn lagerlerge alyp ketken», - deıdi dúnıejúzilik Uıǵyr kongresi komıtetiniń tóraǵasy Omer Kenat.

Belsendilerdiń aıtýynsha, bıliktiń bul is-áreketi zańsyz. Bılik ókilderi uıǵyrlardy tek túrmege jaýyp qana qoımaı, búkil jerge beınebaqylaý kameralaryn, kólik quraldaryna kúshtep GPS ornatyp, 16 men 65 jas aralyǵyndaǵy turǵyndardyń gendik saraptamasyn tekserip jatyr.

Qytaı bıligi Pákistan men Aýǵanstannyń radıkaldy toptary turǵyndarynyń deni ıslam dinin ustanatyn Shyńjań Uıǵyr avtonomıalyq aýdany arqyly elge keledi dep qaýiptenedi eken.