Qazaqstan men Qytaı áriptestigi tyń jobalarmen tolyqty. Eki el kásipkerleri birlesken jańa 35 jobany júzege asyrýǵa baılanysty kelisim jasady.

 Bul jaıynda «Qorǵas» shekara mańy yntymaqtastyǵy halyqaralyq ortalyǵynda ótken bıznes-forýmda belgili boldy, dep habarlaıdy Qamshy.kz aqparat agenttigi  24.kz málimetine súıenip.

 Qorǵas - Qazaqstan men Qytaı shekarasynyń túıisken tusy ǵana emes, strategıalyq seriktestikke serpin beretin ortalyq. Kórshiles eldiń kásipkerleri taǵy qol alysyp, 3 mlrd dollardan asatyn birlesken jobalaryn jasaımyz degen sheshimge keldi. Olar saýda, ónerkásip, ǵylym, bilim jáne týrızm salalaryn qamtıdy. 

«Qorǵas» SHYHO» AQ ákimshilik komıtetiniń prezıdenti Qaharman Jazınniń aıtýynsha, Jarkent pen Qorǵas qalalarynyń arasyndaǵy dostyq týraly kelisimge qol qoıyldy. Bıyl saýda kesheni, qonaq úıler, bıznes ortalyǵy sıaqty jańa nysandar paıdalanýǵa berilmek.

Sondaı-aq oıyn-saýyq ortalyǵynyń qurylysy bastalady. Bul nysandar qytaılyq týrıserdi tartatyn bolady.

«Osy bıznes forýmnyń arqasynda biz qazaqstandyq kompanıamen kelisim jasadyq. 120 mıllıon ıýán ınvestısıa salatyn oıymyz bar»,-deıdi Qorǵas qalasyndaǵy halyqaralyq kompanıanyń dırektory Iýı Chenchjýn.

 Investorlar men kásipkerlerdiń tikeleı dıalogy túrinde ótkiziletin mundaı forým Qorǵasta alǵash ret uıymdastyrylyp otyr. Qatysýshylar jıynda ózderin tolǵandyrǵan barlyq máseleni talqylady. Munaı jıyn iskerlik týrızm, saýda, mádenıet jáne gýmanıtarlyq saladaǵy qarym-qatynasty damytýǵa jańa múmkindikter ashady. 

 «Qorǵas» erkin ekonomıka aımaǵy ákimshilik komıteti basshysynyń orynbasary Ý Haonyń pikirinshe, «Bir beldeý, bir jol» bastamasynyń aıasynda «Qorǵas» shekara yntymaqtastyǵy ortalyǵynda tyń naryqty ıgeretin múmkindikter paıda boldy.

«Qorǵas» shekara mańy yntymaqtastyǵy halyqaralyq ortalyǵy taıaýda erkin ekonomıkalyq aımaq mártebesine ıe boldy. Endi kásipkerler negizgi salyqtan bosatylyp, áleýmettik salyqty ǵana tóleıdi.

Forýmǵa qatysýshylardyń aıtýynsha, bul jeńildik Qytaı ınvestorlaryn Qazaqstanǵa tartýǵa septigin tıgizbek.