Almatynyń Almaly aýdandyq sotynda Muhtar Áýezov atyndaǵy qazaq memlekettik akademıalyq drama teatrynyń burynǵy dırektory Erlan Bilálge qatysty tergeý jumystary jalǵasyp jatyr, dep jazady Qamshy.kz aqparat agenttigi.

Sot aldynda jaýap bergen Erlan Bilálge prokýrorlar bas bostandyǵynan aıyrýdy emes, aıyppul tóletýdi surady.

Erlan Bilál QR Qylmystyq kodeksiniń  24-baby, 3-bóligi, 366-baby, 2-bóligine sáıkes para alýǵa oqtalǵany úshin aıyptaldy. Sotta ol "Sezam" shyǵarmashylyq qorynyń prezıdenti Baıanovtan 2018 jyldyń 2 qańtarynda 600 myń teńge alǵanyn aıtty. Al 4 qańtarda 900 myń teńge alyp jatqan jerinen ustalǵan.  

Endi prokýrorlar osy qarajatty 60 ese artyq etip, ıaǵnı 90 mln teńgeni óteýdi talap etti. Sondaı-aq barlyq memlekettik nagradalarynan: «Aıbyn», Qurmet ordenderinen aıyrylýy múmkin. Al advokatynyń aıtýynsha, Erlan Biláldiń densaýlyǵy syr bere bastaǵan. Sonymen qosa, kináni birden moıyndap, tergeýshilerdiń jumysyn jeńildetkeni úshin jazasyn jumsartýdy surap otyr. 

Esterińizge sala ketsek, 5 qańtarda M.Áýezov atyndaǵy akademıalyq qazaq drama teatrynyń dırektory teatr bazasyn balalarǵa arnalǵan merekelik sharalardy ótkizýge jalǵa bergeni úshin 1,5 mıllıon teńge kóleminde para almaq bolǵany anyqtaldy.

QR eńbek sińirgen qaıratkeri Erlan Bilál Áýezov atyndaǵy qazaq memlekettik akademıalyq drama teatryn 2015 jyldyń 27 sáýirinen beri basqaryp kelgen