Qanat Saharıanov Atameken Business Channel telearnanyń bas dırektory bolyp taǵaıyndaldy, dep habarlaıdy Qamshy.kz aqparat agenttigi.  Bul týraly «Atameken» Qazaqstan Respýblıkasynyń Ulttyq kásipkerler palatasynyń baspasóz qyzmeti habarlady. 

Osyǵan deıin Qanat Saharıanov Atameken Business Channel Baqylaý keńesiniń tóraǵasy jáne «Atameken» QR UKP Basqarýshy dırektory qyzmetinde boldy.

 Qanat Saharıanov ár jyldary «KTK» telearnasynyń Bas dırektory, «Habar» AQ agenttiginiń Basqarma tóraǵasynyń orynbasary, sonymen qatar «Qazmedıa Ortalyǵy» Basqarýshy kompanıasy» JSHS Bas dırektory qyzmetterin atqardy.

 Atameken Business Channel telearnasy damýyndaǵy mańyzdy qadam retinde 2018 jyldyń qańtarynda telearnanyń Astana halyqaralyq qarjy ortalyǵy jáne táýlik boıy aqparat taratatyn telearnasy bar, iskerlik jáne qarjylyq aqparatty taratatyn álem kóshbasshylarynyń biri bolyp sanalatyn Bloomberg kompanıasymen jasaǵan úshjaqty kelisimdi ataýǵa bolady. Osylaısha Atameken Business Channel Astana halyqaralyq qarjy ortalyǵynyń resmı seriktesi atanyp, Bloomberg-pen bir tolqynda tikeleı aqparat pen tájirıbe almasýǵa múmkindik aldy.  

 Atameken Business Channel – bul eki qala: Astana men Almatydan aqparat taratatyn tuńǵysh qazaqstandyq bıznes telearna. Atameken Business Channel ınternet pen televızıa syndy negizgi kontentti platformalarda bar. Telearna Qazaqstannyń, sonymen qatar EAEO,TMD jáne álimniń  iskerlik aqparatyn taratýshy resýrs. Stýdıanyń qonaqtary jetekshi sarapshylar – bıznesmender, kásiporyndar basshylary, memlekettik organdar ókilderi, qoǵamdyq pikir kóshbasshylary. Atameken Business Channel arnasy  saraptamalyq baǵdarlamalar shyǵatyn, naryq boljamdary men naryq qozǵalystary saraptalatyn, mamandar pikiri men sarapshy baǵalary aıtylatyn kásibı minber.