Qaraǵandyda DAISH halyqaralyq lańkestik uıymyna (Qazaqstanda jáne birqatar ózge elderde tyıym salynǵan) qatysqany úshin 30 jastaǵy áıel 9 jylǵa sottaldy, dep habarlaıdy Qamshy.kz aqparat agenttigi inform.kz saıtyna silteme jasaı otyryp.

«Tańatarova Jansaıa Tólendiqyzy QR QK-niń 259-baby 2-bóligine («Terrorıstik ne ekstremıstik áreketti uıymdastyrý maqsatynda adamdardy azǵyryp kóndirý nemese daıarlaý ne qarýlandyrý»), 257-24 baby 3-bóligine («Terrorıstik top qurý, oǵan basshylyq etý jáne onyń áreketine qatysý») sáıkes aıypty dep tanylsyn jáne jazany qylmystyq-atqarý júıesiniń qaýipsizdigi ortasha mekemesinde óteýmen 9 jylǵa bas bostandyǵynan aıyrylsyn», - dep úkimdi oqydy Qaraǵandy oblysy qylmystyq ister jónindegi mamandandyrylǵan aýdanaralyq sotynyń sýdıasy Qaırat Qasymov.

Jansaıa Tańatarova alǵashqy medısınalyq kómek kórsetý daǵdylaryn meńgergen. Ol Sırıada jaraqat alǵan sodyrlardy emdeýdi josparlaǵan.

Eske salaıyq, qaraǵandylyq áıel kámeletke tolmaǵan týysqan inisin Sırıaǵa alyp ketpek bolǵan. Ony Ulttyq qaýipsizdik komıteti Qaraǵandy oblysy boıynsha departamentiniń qyzmetkerleri Qaraǵandydan Sırıaǵa ketpek bolǵan jerinen ustady.

Áıel 2017 jyldyń qyrkúıek aıynda Qaraǵandydan shyǵar joldaǵy «Sokýr» beketinde quryqtaldy. Tergeý nusqasy boıynsha, áıel 2017 jyldyń tamyzynda qarýly qaqtyǵystar bolyp jatqan jerge barmaq bolǵan. Lańkestermen baılanysyp, ózin qatarǵa qosýyn ótingen. Olar buǵan Sırıaǵa jetý jolyn jazyp kórsetken. Áıel ózimen birge 18-ge tolmaǵan qaınysyn da áketpek bolady. Biraq oǵan anasy ruqsat bermegendikten, keıin áketýge ýáde beredi.