Búgin Shymkent qalasynyń ákimi Nurlan Saýranbaev halyq aldynda esepti kezdesýin ótkizdi dep habarlaıdy Qamshy.kz aqparat agenttigi rgmedia.kz saıtynyń deregin negizge ala otyryp. Ol kezdesýge 800-den astam adam qatysyp otyrǵanyn aıtty. Jáne bul kezdesý onlaın túrde ákimdik saıtynda kórsetildi. 

Kezdesýde eks-májilismen, kezinde Ońtústikte iri qyzmetter atqarǵan Shalataı Myrzahmetov til máselesin kóterdi. Esterińizde bolsa, qala ákimi Ál-Farabı aýdany ákimine tek memlekettik tilde baıandama jasaǵany úshin eskertý jasap edi. Mine, bul jaıt Kaznette qyzý talqyǵa tústi. Osyny nazarǵa alǵan eks-májilismen:

– Osy shekteý qoıǵan kezde Elbasynyń til týraly saıasatyn tolyqqandy qoldap jatyrmyn dep oılaısyz ba? Siz basqaryp otyrǵan qalanyń 80-90 paıyzy ómirde memlekettik tildi paıdalanady. Bul shekteýińiz kópke topyraq shashý emes pe? Eger BAQ durys jazbaǵan bolsa, olardy keshirim surap, qaıtadan qate habarlandyrý boldy dep jazýǵa áreket jasadyńyz ba? – dep ákimnen atalǵan suraqtarǵa jaýap berýdi surady.

Qala turǵyndarynyń suraǵyna birden jaýap berýdi jón dep tapqan Nurlan Ermekuly suraq ıelerine jazbasha túrde naqty jaýap beriletinin aıtyp, Myrahmetovtyń suraǵyna jeke toqtalyp ótti.

– Rasýl Gamzatovtyń sózi bar: «eger meniń tilim erteń joıylatyn bolsa, men búgin ólýge daıarmyn» degen. Bul jerde men sizge kómekshi bolamyn, aǵa. Birge jumys isteıik, — dep ony jumysty birge isteýge shaqyrdy.

Eske salsaq, Qamshy.kz aqparat agenttigi osy jaıtqa baılanysty Nurlan Saýranbaev pen OQO ákimi Janseıit Túımebaevqa hat jazǵan bolatyn. Alaıda eki ákim de hatymyzdy jaýapsyz qaldyrdy.