Qyrǵyzstan jeńil ónerkásip qaýymdastyǵynyń (Jeńil ónerkásip) prezıdenti Sapar Asanov Qaraǵandyda satylǵan qyrǵyz kıiminen ýly zat tabyldy degen aqparatqa túsinikteme berdi dep habarlaıdy Qamshy.kz aqparat agenttigi sputniknews.kz saıtyna silteme jasaı otyryp.

Aıta keteıik, «Qyrǵyzstanda jasalǵan» degen tańbasy bar jaıalyqtardan, jeıdeler men jempirlerden formaldegıd tabylǵan edi.  

«Jeńil ónerkásip» basshysy Qyrǵyzstannyń atyn jamylǵan áldekimder eldiń bedelin túsirý úshin osyndaı zıandy kıimder tigip, saýdalap jatyr dep esepteıtinin málimdedi. Sonymen qatar ol bul kıimder Qyrǵyzstan aýmaǵyndaǵy jasyryn sehtarda tigilýi múmkindigin de joqqa shyǵarmady.     

«Bizde, ásirese, balalar kıimi óndirisi qatań baqylanady. Sapa sertıfıkatynsyz elden kıim shyǵarylmaıdy. Bizge «Qyrǵyzstanda jasalǵan» tańbasymen qytaı kıimi jıi túsedi. Qazaqstan jáne Reseımen 20 jyldan astam jumys istep kelemiz, osy ýaqyt ishinde bizdiń taýarlarǵa qatysty birde-bir eskertý bolǵan emes. Bul jasandy buıymdar dep oılaımyn, áldekimder bedelimizdi túsirý úshin bizge or qazyp otyr», — dedi Asanov. 

Memlekettik sanıtarlyq-epıdemıologıalyq qadaǵalaý departamenti baǵynatyn densaýlyq saqtaý mınıstri Talantbek Batyrálıev qaýipti taýar óndirisi týraly ázirge naqty aqparat joq ekenin habarlady. Sondyqtan bul kıimder Qyrǵyzstanda tigildi deýge áli erte.  

«Eger aqparat rastalsa, biz bul ispen aınalysyp, sońyna deıin jetkizemiz. Alaıda bizde óndirýshi jáne taýar quramy týraly naqty aqparat joq. Óz basym otandyq ónerkásip ónimine qatysty birde-bir shaǵym alǵan joqpyn. Ol tıisti deńgeıde tekserilip jatyr», — dep atap ótti mınıstr.