«Qazaqstan daýysy» tanymal mýzykalyq jobanyń jeńimpazy ataǵyna tórt úmitkerdiń qaısysy ıe bolady? «Qazaqstan daýysy» mega-jobasynyń bas syılyǵy - 5 mln. teńge kimge buıyrady? Osynyń barlyǵy aldaǵy jeksenbi kúni belgili bolady.

Shoý-bıznes álemindegi eń tanymal mýzykalyq jobanyń ozyq shyqqan tórt úmitkerimen jaqyn tanys bolyńyzdar.

Eki balanyń ákesi jáne qolónershi bolýdy armandaıtyn Maqsat Maqulbekov

Maqsat Maqulbekov – «Qazaqstan daýysy» mega-jobanyń Grand-fınalyna shyqqan tórt úmitkerdiń biri. Tálimgeri – Medeý Arynbaev. Fınalǵa shyqqan úmitkerlerdiń ishinde otbasyn qurǵan jalǵyz qatysýshy.

Jobaǵa kelgenge deıin Abaı atyndaǵy MAOBT-ta qyzmet etti, «Ańsar» tobynyń ánshisi. Qyzylorda qalasyndaǵy Qazanǵap atyndaǵy mýzyka kolejiniń túlegi. Qazirgi ýaqytta Qurmanǵazy atyndaǵy Qazaq Ulttyq konservatorıanyń magıstranty.

Úılengen. Eki balasy bar. Ómirindegi eń baqytty sátteriniń biri – Meıirjan men Mıras atty eki ulynyń dúnıege kelgen kúnderi. Bos ýaqytyn otbasymen ótkizgendi jón kóredi. Maqsattyń ustanymy: «Naǵyz otbasy – bul ózińdi jaqsy kóretin jáne árdaıym kútip turatyn qorǵanyń, buzylmas qamalyń».

Bala kezinde Djekı Chandy, Jan Klod Van Dammdy pir tutqan. Bul áýesqoılyǵyn kúreske qatysyp, osyndaı iri deneli akterlerdi unatatynymen túsindiredi.

Maqsat ıtalándyq tenor Lýchano Pavarottıdiń týyndylaryn jalyqpaı tyńdaıdy. «Eger án aıtpaǵan jaǵdaıda, kúrespen nemese jıhaz jasaıtyn seh ashyp, usta bolar ma edim?!», - dep syryn aqtarady.

Indıra Edilbaeva ándi ǵana jaqsy aıtyp qoımaıdy, sonymen qatar aǵylshyn tilin jetik meńgergen

«Qazaqstan daýysy» mega-jobasynyń kelesi úmitkeri – Indıra Edilbaeva. Atyraýda dúnıege kelgen. 7 jasyna deıin Aqtaýda, keıin Aqtóbede ósken. Sońǵy eki jyl boıy Almaty qalasynda turady. Jubanov atyndańy Aqtóbe Memlekettik Ýnıversıtetin aǵylshyn jáne nemis tilderiniń aýdarmashysy mamandyǵy boıynsha aıaqtaǵan.  Ómirlik ustanymy: «Qandaı jaǵdaı bolmasyn, óz qalpyńnan taıma!». Tálimgeri – Mádına Sadýaqasova.

«Qazaqstan daýysy» mega-jobasyna deıin Indıra vokaldy-aspapty ansámblde tájirıbe jınaqtap, jumys istedi. Atalǵan joba Indıra úshin kókeıinde júrgen armanyna aparatyn jol.

Indıra otbasynda jalǵyz bala. 13 jasynda ákesi dúnıeden ótti. Indıra: «Anam  ákemniń, aǵam men ápkemniń ornyn basqan aqylshym, tiregim», - dep óz oıymen bólisedi.

«Anam, mektepte aǵylshyn tilinen sabaq beredi. Anamnyń arqasynda aǵylshyn tiline, shetel ánderine degen qyzyǵýshylyǵym oıandy. Áli esimde, 5 jasar kezimde anam magnıtafonnan Mariah Carey-diń taspalaryn qosatyn, onyń ánderine bılep, yńyldap án salyp, úı sharýasymen aınalysatynbyz», - deıdi Indıra.

Jeke qalǵanda Sade atty ánshiniń ánderin tyńdaýdy unatady. «Janymdy terbeter, daýysy keremet ánshilerdiń biri. Men bir baǵyttaǵy ǵana mýzykany tyńdamaımyn, rokty da, keıde qazaqtyń halyq ánderin de tyńdaımyn», - deıdi Indıra.

«Eger án aıtpasań, nemen aınalysar ediń?», - degen suraqqa: «Shetel kompanıasynda mamandyǵym boıynsha aýdarmashy bolyp qyzmet ister edim. Anam ómir boıy aýdarmashy bolǵanymdy jáne ómirimdi aǵylshyn tilimen baılanystyrǵanymdy qalaıtyn, biraq men án aıtýdy jón kórdim», - dep jaýap berdi.

Danıar Ismaılov dombyrany asqan sheberlikpen tartady jáne áskerı orkestrdiń jeke oryndaýshysy

«Qazaqstan daýysy» mega-jobasynyń úshinshi úmitkeri - Danıar Ismaılov. Tálimgeri – Nurlan Alban. Danıar Túrkistan qalasynyń týmasy, Shymkent qalasyndaǵy A.Iassaýı atyndaǵy Halyqaralyq qazaq-túrik ýnıversıteti  óner fakúltetiniń túlegi. Qazirgi ýaqytta Almaty qalasyndaǵy áskerı orkestrdiń jeke oryndaýshysy. Minezi salmaqty. «Qazaqstan daýysy» jobasyna deıin kolej stýdentterine dombyra tartýdy úıretetin.

Án shyǵaryp, terme oryndaıdy. Armany ataqty ánshi bolý. Qazaqstannyń estrada oryndaýshylaryn jıi tyńdaıdy. Bala kezinen Dosqan Joljaqsynovty, Nurlan Ónerbaevty, Bekbolat Tileýhandy pir tutady. Ómirindegi eń qýanyshty sáti mektepti úzdik atestatqa aıaqtaǵan kezi. «Eger ánshi bolmasam, bızneske keter edim», -  deıdi Danıar.

«Qazaqstan daýysy» jobasy bolmasa, munaıshy bolar edim» - Baýyrjan Retbaev

«Qazaqstan daýysy» mega-jobasynyń sońǵy úmitkeri - Baýyrjan Retbaev. Tálimgeri – Almas Kishkenbaev. Mańǵystaý oblysynyń týmasy. Qazirgi ýaqytta T.Júrgenov atyndaǵy Qazaq Ulttyq óner akademıasynda estrada vokaly mamandyǵy boıynsha bilim alýda. 2013 jyly Sh.Qaldaıaqov atyndaǵy halyqaralyq konkýrstyń úshinshi oryn júldegeri.

Sportpen shuǵyldanady. Naqty aıtqanda, otandyq fýtboldyń jankúıeri. Ánshilerden Meırambek Bespaevtyń, Aqylbek Jemeneıdiń jáne «Zaman» tobynyń ánderin tyńdaıdy.

Týǵan-týystary jáne jaqyndary erkeletip, «Baýkabaı» nemese «Baýka» dep ataıdy.

Ómirindegi eleýli oqıǵalardyń biri týǵan kúnin atap ótken Italıaǵa jasaǵan sapary.

«Eger ánshi bolmasam, jerlesterimniń basym kópshiligi sıaqty munaıshy bolar ma edim?», -dep, Baýyrjan oıymen bólisedi.