«Qazgıdromet» RMK sońǵy jyldary elimizde kóptep oryn ala bastaǵan kóktemgi sý tasqyndarynyń sebebin túsindirdi, dep habarlaıdy Qamshy.kz aqparat agenttigi Qazaqparattyń deregin negizge alyp.

Qazgıdromettiń málimetine súıensek,  respýblıka terıtorıasy relef pen klımattyń aıryqsha ártúrliligimen erekshelenetindikten, apatty gıdrologıalyq qubylystar bir oblysta nemese basqa da óńirlerde jyl saıyn qaıtalanady. Qazaqstan aýmaǵynda naýryz-mamyr aılarynda árdaıym sý tasqyny júredi.

«Sý tasqyny men sý basý úlken kólemdegi qar qory, qardyń qarqyndy erýi, kúzden bastap qatty ylǵaldanǵan jáne qatyp qalǵan topyraq jaǵdaıy jáne qatty jaýyn-shashynnyń túsýi syndy birneshe tabıǵı faktor saldarynan bolady. Biraq, qar qory kóp bolmasa da qatty jaýyn-shashyn jáne topyraqtyń qatyp qalýy kezinde Shyǵys Qazaqstan oblysyndaǵydaı ekstremaldy joǵary sý tasqyny qalyptasýy múmkin. Ózenderde seń keptelisteriniń paıda bolýy da sý deńgeıleriniń kúrt kóterilýine, sýdyń tasýy men jaıylmaǵa shyǵýyna yqpal etýi yqtımal», - dep jaýap berdi "Qazgıdromet"RMK baspasóz qyzmeti agenttiktiń resmı saýalyna.

Taý ózenderinde sý tasqyny barlyq kóktem-jaz mezgilinde nóser jańbyr jaýǵanda bolady. Tasyǵan sýdyń  basym bóligi ózen júıeleri damyǵan taýly aýdandar - Almaty (sý tasýdyń joǵary kórsetkishi men sel) Shyǵys Qazaqstan (sý tasqyny men muz keptelisi), Ońtústik Qazaqstan oblystary (sý tasqyny) aýmaǵynda.

«Qazaqstannyń ekonomıkasyna zıan keltiretin sý tasqyny qaıtalanýy joǵarylady. Bul, eń aldymen, sońǵy onjyldyqta ótken kezeńmen salystyrǵanda Qazaqstannyń kóptegen taýly ózenderinde sý kóleminiń artýyna baılanysty. Al taýly ózenderde sý kóleminiń artýy jáne sý tasýdyń qaıtalanýy klımattyń ózgerýine, aýa temperatýrasynyń joǵarylaýyna, taý muzdyqtarynyń degradasıasyna jáne muzdyqtardan sý berilýiniń joǵalýyna baılanysty. Budan basqa, jylymyqtyń áserinen taýly aýdandarda sý tasqynyn ulǵaıtatyn jaýyn-shashyn kóptep jaýa bastady», - delingen habarlamada.