Aldaǵy 1 aıda Maqtaral aýdanyna kireberis sanalatyn Dildábekov aýyldyq okrýginiń mańyndaǵy jol jıekteri jańa keıipke enetin bolady. Naqtyraq aıtsaq, kórki kóz tartar sharbaqtar men jol shamdary ornatylyp, tolyqtaı abattandyrylmaq dep jazady Qamshy.kz aqparat agenttigi Maqtaral aýdany ákiminiń baspasóz qyzmetine silteme jasap. 

Dál osyndaı jumystar Asyqata kentinde jalǵasyp, Qazybek bı aýyldyq okrýgi mańyndaǵy jol jıegi de kógaldandyrylyp, jaıaý júrginshilerge arnalǵan jolaıaq salý josparlanyp otyr. Sondaı-aq, Jetisaı qalasynyń kireberisindegi jol jıekteri de qalypqa keltirilip, kópir mańyndaǵy gúlzarda erekshe keıiptegi jaryq shamdary ornatylmaq. Mundaı abattandyrý jumystary aýdandymyzdyń barlyq eldi mekenderinde jasalynady. Búgin bul týraly aýdandaǵy senbilik barysymen tanysyp shyqqan óńir basshysy J.Beısenbaev málim etti.

Búginde Maqtaral aýdanynda osydan 1 apta buryn bastalǵan senbilik jalǵasýda. Ótken apatada jol-jıekteri kúl-qoqystan tazartylyp, gúlder egilse, bul joly jappaı tal egý jumystary qarqyn aldy. Atap aıtqanda, 3814 dana aǵash kóshetteri men shyrsha otyrǵyzyldy. Tal egý jumystaryna kýá bolǵan aýdan ákimi ózi de tal otyrǵyzyp, jastarǵa kútip-baptaýdyń qyr-syryn úıretti.

Senbilikke barsha qala, kent, aýyldyq okrýgterden 10 myńnan asa adam jáne 31 tehnıka qatysyp, 420 tonna retsiz kúl-qoqys shyǵaryldy. 83 shaqyrym kósheniń boılary, 22 shaqyrym aıaqjoldar tazalanyp, retke keltirildi. Sonymen qatar, 10 balalar alańshalary, 4 sport alańshalary men 15 avtobýs aıaldamalary áktelip, syrlandy.

Odan bólek, 145 kópqabatty úılerdiń aýmaqtary men kireberisteri, 2671 sharshy metr úı irgelik aýlalary retke keltirilse, 1,775 shaqyrymdy quraıtyn ırrıgasıalyq júıeler qoqystan aryldy.

Aıta keteıik, aýdan ákiminiń bastamasymen ótip jatqan senbilik keler apta jalǵasatyn bolady.